“Qəbələ”nin “Borussiya”, “Qarabağ”ın “Monako” sınağı
Bakı, 22 oktyabr, AZƏRTAC
Bu gün UEFA Avropa Liqasının qrup mərhələsində üçüncü turun oyunlarına start veriləcək.
AZƏRTAC xəbər verir ki, mötəbər turnirdə Azərbaycanı təmsil edən “Qəbələ” və “Qarabağ” komandaları bu turda çətin sınaq qarşısındadırlar. Roman Qriqorçukun yetirmələri Bakıda Dortmundun “Borussiya” (Almaniya) klubu ilə qarşılaşacaq. Son beş ev oyununda qapısını toxunulmaz saxlaya bilən “Qəbələ” almanlara qarşı da əzmkar mübarizə aparıb, xal qazanmağa çalışacaq. Oyunu xorvatiyalı baş hakim İvan Bebek idarə edəcək.
“Bakcell Arena”da keçiriləcək görüş saat 20:00-da başlayacaq.
Avroliqadakı digər təmsilçimiz, Azərbaycan çempionu “Qarabağ” isə səfərdə “Monako”nun qonağı olacaq. Qrupda keçirdiyi iki oyundan üç xal toplayan ağdamlılar ikinci pillədəki yerini qorumaq üçün Fransa səfərindən sərfəli nəticə ilə qayıtmağı qarşıya məqsəd qoyub. Oyunu danimarkalı baş hakim Yakob Kehlet idarə edəcək.
Qarşılaşma Bakı vaxtı ilə saat 22:00-da başlayacaq.
Bölmənin digər xəbərləri
