Qərinələrə, əsrə bərabər dörd il
Bakı, 7 noyabr, AZƏRTAC
Xalqımız və dövlətimiz çox mühüm tarixi hadisə ərəfəsindədir. Sabah Cənubi Qafqaz regionunun siyasi, iqtisadi və geostrateji mənzərəsini dəyişən, erməni faşizmi üzərində qazanılan tarixi Zəfərin – Qarabağ Zəfərinin növbəti ildönümünü qeyd edəcəyik. Dörd il əvvəl qazanılan bu şanlı Qələbə bütün dünyada böyük əks-sədaya səbəb olmaqla, beynəlxalq münasibətlər sistemində Azərbaycan dövlətinin mövqelərini möhkəmləndirib, haqqın, ədalətin, beynəlxalq hüququn təntənəsi kimi, tarix kitablarına qızıl hərflərlə həkk olunub. Dörd il yaşı bilinməyən bəşər tarixi üçün çox qısa xronoloji çərçivə olsa da, Azərbaycan üçün öz tutumuna, çəkisinə və siyasi əhəmiyyətinə görə qərinələrə, hətta əsrlərə bərabər bir müddətdir - ən azı erməni faşizminin 30 il ərzində dağıdıb məhv etdiyi maddi və mənəvi sərvəti cəmi dörd ilə bərpa edib yenidən məxsus olduğu xalqın ixtiyarına vermək baxımından.
Bu sözləri AZƏRTAC-a açıqlamasında “İslahatçı Gənclər” İctimai Birliyinin sədri, siyasi şərhçi Fərid Şahbazlı deyib.
O bildirib ki, hələ hərbi əməliyyatların gedişində Müzəffər Ali Baş Komandan İlham Əliyevin bilavasitə rəhbərliyi ilə bərpa və quruculuq işlərinə, eləcə də qaçqın və məcburi köçkünlərin öz yurd-yuvalarına qayıtmasının hazırlıqlarına başlanıldı. Çox qısa bir müddətdə iki hava limanı (3-cüsü də yaxın vaxtlarda istifadəyə veriləcək), neçə-neçə məktəb, uşaq bağçası, muzeylər, infrastruktur obyektləri, universitet və digər mühüm obyektlər istifadəyə verilib. Ağalı, Talış kəndlərində minimum yaşayışın təmin edilməsi demək olar tam şəkildə yekunlaşıb. Dörd yüz əlli ailə demək olar yenidən qurulan Laçın şəhərinə qayıdıb. Zabux və Sus kəndləri öz əvvəlki növrağına qovuşub, Zəfər tariximizin simvolu olan Şuşadan isə yenidən çal-çağır səsi, Xanın zənguləsi və Xarı bülbülün nəfəsi duyulmaqdadır. Ruhu şaddır bu gün Pənahəli xanın.
“Lakin görüləsi işlər və buna mane olan səbəblər də az deyil. Ən ciddi səbəb isə vaxtilə bu ərazilərin başdan-başa minalanmasıdır. Belə ki, işğalçı ermənilər 30 il ərzində sərvətini soyub taladığı bu torpaqlarda bir ağac belə yetişdirmədikləri halda, saysız-hesabsız mina, partlayıcı qurğular, bomba və sair “əkib-becəriblər”. Ötən dövr ərzində nə qədər əsgərimiz və mülki insanlarımız bu xain pusquların qurbanı olub?!”, - deyə QHT sədri qeyd edib.
Buna baxmayaraq, hazırda azad nəfəs alan Qarabağ və Şərqi Zəngəzura Böyük Qayıdışın davam etdiyini söyləyən F.Şahbazlı deyib: “Rəsmi məlumatlara görə, artıq 9 minə yaxın keçmiş məcburi köçkün öz doğma el-obasına qayıdıb. Amma bu, yekun rəqəm sayıla bilməz. Belə ki, həmin bölgələrdə tikinti-quruculuq işlərində çalışanları, universitet tələbələrini, müəllimləri, habelə dövlət-idarəetmə qurumlarında çalışanları da bu sıraya əlavə etsək, hazırda azad edilən torpaqlarımızda 30 minə yaxın insanın yaşadığını görərik. İlin sonuna qədər bu rəqəmin daha da artacağı gözlənilir. Bəli, dörd il əvvəl dünya Azərbaycan əsgərinin tükənməz gücünü, dəmir iradəsini, sonsuz Vətən sevgisini və qələbə əzmini gördü. Bu gün isə həmin dünya Azərbaycan xalqının yaşamaq-yaratmaq eşqinə, fitri istedadına və tükənməz enerjisinə şahidlik etməkdədir. Dostlarımız sevinir, qürur duyur, düşmənlərimz isə təbii ki, kədərə-qəmə qərq olur, yasa boğulurlar...”.
Bölmənin digər xəbərləri
