Qətərin Baş naziri: Qəzza sektoru ilə bağlı danışıqlar hələ nəticə verməyib
Bakı, 20 may, AZƏRTAC
Qəzza sektorunda münaqişənin nizamlanmasına dair HƏMAS hərəkatı ilə İsrail arasında Dohada keçirilən məsləhətləşmələr hələ ki, tərəflərin mövqelərinin yaxınlaşmasına səbəb olmayıb.
AZƏRTAC xəbər verir ki, bunu Qətərin hökumət başçısı və xarici işlər naziri Şeyx Məhəmməd bin Əbdül Rəhman Əl Tani deyib.
“Təəssüf ki, son bir neçə həftə ərzində Dohada keçirilən danışıqlar heç bir nəticə verməyib, tərəflərin mövqeləri arasında əsaslı uçurum mövcuddur. Onlardan biri hərtərəfli sazişə gətirib çıxara biləcək qismən razılaşma, digəri isə müharibəni dayandırmaq və bütün girovları azad etmək üçün birdəfəlik razılaşma əldə etməyə çalışır. Sövdələşmənin uğursuzluqla nəticələndiyi keçmiş təcrübəni nəzərə alaraq irəli sürdüyümüz bütün təkliflərə baxmayaraq, bu fundamental boşluğu aradan qaldıra bilmədik”, - deyə Baş nazir Qətər İqtisadi Forumunda çıxışı zamanı bildirib.
Baş nazirin sözlərinə görə, İsrail əməliyyatları genişləndirsə, həm fələstinlilər, həm də Qəzza sektorunda saxlanılan əsirlər arasında itkilər artacaq.
Qeyd edək ki, HƏMAS mayın 12-də ABŞ vətəndaşı olan israilli hərbçi İdan Aleksandrı azad edərək Qəzzada hərtərəfli və daimi atəşkəs üzrə danışıqların dərhal bərpasına hazır olduğunu təsdiqləyib. Eyni zamanda, İsrailin Baş naziri Benyamin Netanyahu elə həmin gün ABŞ Prezidentinin xüsusi elçisi Stiv Uitkoffla danışıqlardan sonra nümayəndə heyətinin Qətərə göndərilməsi barədə göstəriş verib.
Bölmənin digər xəbərləri
