Bakı, 21 aprel, AZƏRTAC

Dünya Azərbaycanlılarının təşkilatlanması və diaspor quruculuğunun əsasını qoyan ulu öndər Heydər Əliyev xaricdə yaşayan soydaşlarımıza hər zaman yüksək diqqət və qayğı göstərib. Azərbaycan diasporuna dövlət qayğısının əsası məhz Ümummilli Liderimiz tərəfindən qoyulub. Azərbaycan 1991-ci ildə dövlət müstəqilliyini yenidən bərpa edərkən dünya azərbaycanlılarının necə və hansı ideologiya ətrafında təşkilatlanacağına dair təsəvvürləri yox idi. Çünki ortada böyük boşluq var idi - həmvətənlərimizi öz ətrafında birləşdirəcək lider və ideologiyanın olmaması. Ümummilli lider Heydər Əliyev diaspor quruculuğunda məhz bu iki amilin əsasını qoyaraq dünya azərbaycanlılarını bir araya gətirəcək lider kimi hər kəsi azərbaycançılıq ideologiyası ətrafında birləşdirdi. Burada əsas məqsəd vətənindən uzaq düşən həmvətənlərimizin Azərbaycanla bağlarını bərpa etmək idi. Bu məqsədlə keçirilən dünya azərbaycanlılarının qurultayları və Ulu Öndərin qurultay iştirakçılarına ünvanlanan çıxışları diasporumuzun ideoloji bazasının formalaşmasında mühüm rol oynadı. Məhz bu dönəmdə Azərbaycan Xalq Cümhuriyyətinin süqutundan sonra xaricə üz tutan və sovetlər dönəmində vətəni ilə əlaqələri kəsilən soydaşlarımızın davamçılarının müstəqil Azərbaycana yenidən qayıdışı baş verdi.

Əlbəttə ki, onların nə hiss etdiklərini və düşüncələrini məhz Ulu Öndərlə keçirilən görüşlərdə görmək olardı.

Bu fikirləri AZƏRTAC-a açıqlamasında Azərbaycan-Amerika Gəncləri İctimai Birliyinin sədri Vüqar Əhmədov deyib.

QHT sədrinin sözlərinə görə, dünyada çox nadir ölkələr var ki, onların diasporla işini ələqələndirən ayrıca bir qurum olsun. Məhz Ulu Öndər diaspor quruculuğuna böyük önəm verdiyindən 2002-ci ildə Xaricdə Yaşayan Azərbaycanlılarla İş üzrə Dövlət Komitəsinin təsis edilməsinə qərar verilmişdi. Sonralar Diasporla İş üzrə Dövlət Komitəsi adlandırılacaq bu qurum azərbaycanlıların diaspor fəaliyyətinin koordinasiya olunmasında mühüm və davamlı işlər aparıb.

“2006-cı ildən etibarən Prezident İlham Əliyevin rəhbərliyi ilə keçirilən Dünya Azərbaycanlılarının ll, lll və lV qurultayları onu deməyə əsas verir ki, dövlətimizin siyasəti həm diasporumuzun daha da güclənməsinə, həm də haqq işimizdə və xarici ölkələrdə Azərbaycan maraqlarının müdafiəsində diasporumuzun rolunu artırmaq olub. Keçirilən bütün qurultaylarda diasporumuzun qarşısında duran əsas çağırışlar və hədəflər müzakirə olunaraq hər keçirilən qurultaydan sonra diasporumuz keyfiyyətcə yeni mərhələyə qədəm qoyurdu, hədəflərə daha çox yaxınlaşırdı. Vurğulamaq lazımdır ki, Prezident İlham Əliyev qurultaylardakı çıxışlarında azərbaycanlıları daha fəal olmağa, vətənlərinin maraqlarını ən üst səviyyədə tutmağa və torpaqlarımızın işğaldan azad olunması üçün davamlı fəaliyyət göstərməyə çağırıb. Eyni zamanda, Prezident İlham Əliyev və Azərbaycan dövləti hər zaman diasporumuzun yanında olaraq onlara dəstək olmağa, Azərbaycan təşkilatlarının güclənməsində həmvətənlərimizə lazım olan dəstəyi nümayiş etdiriblər. Dövlətimizin başçısının bu sahədə apardığı ən uğurlu siyasəti isə məhz diasporumuzun milli ruhda formalaşmasına xidmət edib. Bu məqsədlə yalnız qurultaylarda deyil, ayrı-ayrı zamanlarda soydaşlarımızın öz vətəninə müntəzəm səfərləri təşkil olunaraq müxtəlif mədəni proqramlar keçirilmiş və “Vətən uzaqda deyil” mesajı verilib”, - deyə V.Əhmədov qeyd edib.

QHT sədrinin sözlərinə görə, Prezident İlham Əliyevin apardığı uzaqgörən və məqsədyönlü diaspor siyasəti məhz yeni nəsil diasporun meydana çıxmasına səbəb oldu. Diaspor quruculuğuna xaricdə təhsil almış böyük gənclər ordusunun axını və onların iştirakı ilə dünyanın aparıcı ölkələrində Azərbaycan icmalarının yaranması diaspor sahəsində yeni yanaşma idi. Bu icmalar əsas etibarı ilə xarici ölkələrin təhsil ocaqlarında yaranmaqla bu ölkələrin akademik çevrələrində, elm ocaqlarında və beyin mərkəzlərində Azərbaycanla bağlı daha dolğun və düzgün təsəvvürün formalaşmasında iştirak edirdilər. Eyni zamanda, diaspor təşkilatlarının xarici ölkələrdə keçirilən çoxsaylı layihələrinə dövlət dəstəyi göstərilib. İnformasiya kommunikasiya texnologiyalarından məharətlə istifadə edən Azərbaycan cəmiyyətləri və icmaları yaşadıqları ölkələrin qanunverici orqanlarına və ictimaiyyətinə müxtəlif petisiyalar və müraciətlər hazırlayaraq Azərbaycan maraqlarının lobbiçiliyində yeni ənənənin əsasını qoydular.

“Bu sahədə görülən ən vacib işlər sırasında Birinci vitse-prezident Mehriban xanım Əliyevanın təşəbbüslərini və gördüyü işləri xüsusi ilə qeyd etmək lazımdır”, - deyə bildirən V.Əhmədov vurğulayıb ki, məhz Birinci vitse-prezident Mehriban xanım Əliyevanın təşəbbüsü ilə xaricdəki azyaşlı uşaqlar üçün “Qarabağ” adlı Azərbaycan məktəbləri təsis olunub. Bu gün həmin məktəblərdə 250-dən artıq azərbaycanlı uşaq ana dilində təhsil alır, son 4 ildə 31 ölkəni əhatə edən 14 Koordinasiya Şurası, 12 ölkədə 18 Azərbaycan Evi yaradılıb.

QHT sədri diqqətə çatdırıb ki, çağdaş diaspor fəaliyyətində informasiya-kommunikasiya texnologiyalarından və rəqəmsal medianın imkanlarından istifadə olunmaqla soydaşlarımızla mütəmadi və sıx əlaqələr qurulur. Görülən məqsədyönlü işlərin və dövlətin uğurlu diaspor siyasəti nəticəsində tam əminliklə demək olar ki, bu gün Azərbaycan diasporunun fəaliyyəti Strateji Yol Xəritəsi əsasında həyata keçirilir və milli həmrəylik ən yüksək səviyyədədir. Milli məsələlərdə Azərbaycan diasporu çox böyük həmrəylik nümayiş etdirərək milli maraqlardan çıxış edir. Azərbaycanın dövlət və milli maraqlarının müdafiəsi işində diasporun rolunun biz 44 günlük Vətən müharibəsi ərəfəsində bir daha şahidi olduq. Belə ki, Vətən müharibəsi dövründə diaspor təşkilatları dünyanın 30-dan çox ölkəsində 200-dək aksiya keçirmiş, bu aksiyalarda ümumilikdə 25 mindən çox soydaşımız və dost xalqların nümayəndələri iştirak etmiş, 50-dən çox ölkədə fəaliyyət göstərən 300-ə yaxın diaspor təşkilatının müxtəlif ölkələrin dövlət və hökumət rəhbərlərinə, parlament üzvlərinə, beynəlxalq təşkilatlara bəyanatlar, müraciətlər göndərib. Xüsusilə ABŞ-ın müxtəlif ştatlarında, eləcə də Avropa ölkələrinin paytaxt şəhərlərində diaspor təşkilatlarının nümayəndələri və soydaşlarımız keçirilən yürüşlərdə xüsusi fədakarlıq nümayiş etdiriblər. Şübhəsiz ki, bütün bunlar diasporumuzun vahid milli ideya ətrafında sıx birləşməsindən xəbər verir.

“Qürur hissi ilə qeyd etməliyəm ki, Dünya Azərbaycanlılarının V Qurultayının azad olunmuş torpaqlarımızda, doğma Qarabağımızda keçirilməsinin böyük rəmzi mənası var. İllərdir ki, Qarabağın azad olunması uğrunda soydaşlarımız və diasporumuz səfərbər olaraq ardıcıl və yorulmadan fəaliyyət göstərdi. Məhz Prezident İlham Əliyevin qətiyyəti və siyasi iradəsi sayəsində azad olunan Şuşa tezliklə dünya azərbaycanlılarını bir araya gətirəcək. Şübhəsiz ki, bu reallıq dünya azərbaycanlılarının Lideri, hər zaman milli və dövlət maraqlarından çıxış edən Prezident İlham Əliyevin düşünülmüş siyasəti nəticəsində mümkün oldu.