Qırğızıstan növbədənkənar prezident seçkiləri və referenduma doğru
Bişkek, 6 yanvar, АZƏRTAC
Yanvarın 10-da Qırğızıstanda növbədənkənar prezident seçkiləri və respublikada idarəçilik formasının müəyyənləşdirilməsi ilə bağlı referendum keçiriləcək.
AZƏRTAC Qırğızıstan Mərkəzi Seçki Komissiyasına istinadla xəbər verir ki, seçkilərə və referenduma hazırlıq işləri başa çatıb. Bu böyük siyasi kampaniyada 3 milyon 563 min 574 seçicinin iştirak edəcəyi gözlənilir.
Prezident seçkilərində 18 namizəd mübarizə aparacaq. Referenduma isə “Prezidentli respublika”, “Parlamentli respublika” və “Bütün variantların əleyhinə” məsələləri çıxarılacaq.
Xatırladaq ki, hazırda Qırğızıstanda “Parlament-Prezident” idarə üsulu mövcuddur.
Qırğızıstan qanunlarına görə, seçicilərin 30 faizi səs verdikdə seçkilər və referendum baş tutmuş hesab olunur.
Qulu Kəngərli
AZƏRTAC-ın xüsusi müxbiri
Bişkek
Bölmənin digər xəbərləri
