SİYASƏT
Qırğızıstan parlamentinin sədri Azərbaycanın bu ölkədəki səfirini qəbul edib
Bakı, 1 iyun, AZƏRTAC
Qırğızıstan parlamentinin - Joqorku Keneşin sədri Talant Mamıtov Azərbaycanın bu ölkədəki səfiri Lətif Qəndilovu qəbul edib.
AZƏRTAC xəbər verir ki, tərəflər iki ölkə arasında hərtərəfli əlaqələrin aktivləşdirilməsi və parlamentlərarası əməkdaşlığın genişləndirilməsi məsələlərini müzakirə ediblər.
Sədr Talant Mamıtov ikitərəfli münasibətlərə yüksək qiymət verərək vurğulayıb ki, ölkələr gələn il əlamətdar tarixi - Qırğızıstan ilə Azərbaycan arasında diplomatik münasibətlərin qurulmasının 30 illiyini qeyd edəcəklər. O deyib: “Biz tarixi qardaşlıq və dostluq ənənələrinə əsaslanan qarşılıqlı münasibətləri bundan sonra da fəal inkişaf etdirməli, siyasi-iqtisadi və mədəni-humanitar tərəfdaşlığı möhkəmləndirməliyik”.
Qırğızıstan parlamentinin sədri Prezident Sadır Japarovun aprel ayında Azərbaycana rəsmi səfərini də xatırladaraq əlavə edib ki, əldə olunan razılaşmaların icrası Qırğızıstan-Azərbaycan əməkdaşlığına yaxşı təkan verəcək.
Parlamentlərarası qarşılıqlı fəaliyyətin genişlənməsinə toxunan Talant Mamıtov dövlətlərarası münasibətlərin bu sahəsində diplomatiyanın əhəmiyyətini qeyd edib.
Öz növbəsində, səfir Lətif Qəndilov Azərbaycanın Qırğızıstan ilə hərtərəfli qarşılıqlı fəaliyyətin möhkəmləndirilməsində maraqlı olduğunu bildirib, strateji tərəfdaş qismində əməkdaşlığın yeni səviyyəsinə çıxmağın zəruriliyini vurğulayıb.
Görüşdə ikitərəfli səfərlərin təşkili və parlamentlərarası dostluq qrupları arasında dialoqun genişləndirilməsi məsələlərinə də toxunulub.