Qisasını döyüş meydanında alan qəhrəman VİDEO
Daşkəsən, 13 oktyabr, Vüsalə Cənnətova, AZƏRTAC
44 günlük Vətən müharibəsində erməni təcavüzünü qəhrəmancasına dəf edən, düşmənə sarsıdıcı zərbələr endirən, sonda şanlı Qələbə qazanan vətənpərvər oğullarımız, Vətən fədailəri qürur mənbəyimizdir. Elməddin Vəkilov da belə igidlərimizdəndir. Hələ bələkdə ikən ermənilərin azərbaycanlılara qarşı törətdiyi deportasiyanın qurbanı olan Elməddin mənfur, təcavüzkar düşmənə döyüş meydanında divan tutaraq şəhidlik zirvəsinə yüksəlib.
AZƏRTAC-ın bölgə müxbiri xəbər verir ki, Elməddin Vəkilov 1988-ci il avqustun 21-də Qərbi Azərbaycanda anadan olub. Şəhidin anası Nərgiz Vəkilova doğma yurdlarını körpə oğlu və həyat yoldaşı ilə birgə 1988-ci ildə tərk etmək məcburiyyətində qaldıqlarını bildirir. “Qərbi Azərbaycanın Allahverdi rayonunun Ağtala kəndindənik. Şəhid balam orda anadan olub. O, 20 günlük olanda bizi deportasiya etdilər. Daşkəsəndə yerləşdik. Oğlum burada məktəbi bitirdi, hərbi xidmətə yollandı. 2013-cü ildən isə ordu sıralarına müddətdən artıq həqiqi hərbi xidmət hərbi qulluqçusu kimi qayıtdı. Tovuz döyüşlərində iştirak edib, Polad Həşimov onun komandiri olub. Döyüşlərdən qayıdanda dedi ki, “mənim komandirimi vurublar, onun qisasını mütləq alacağam”, - deyə Nərgiz Vəkilova söyləyir.
Elməddin Vəkilov sözünə sadiq qalır. 44 günlük Vətən müharibəsi başlayanda daha 3 gün əvvəl toyu olmuş Elməddin digər hərbçi yoldaşları ilə birgə Vətənin müdafiəsinə qalxır. Murovdağ istiqamətində gedən döyüşlərdə qəhrəmancasına döyüşür, düşmənin çoxsaylı canlı qüvvəsini məhv edərək qisasını alır, özü isə şəhadətə yüksəlir. Elməddin Vəkilovun uzun müddət tapılmayan nəşi 2021-ci il mayın 7-də aşkarlanır və Daşkəsənin Şəhidlər xiyabanında dəfn olunur.
Nərgiz xanım deyir ki, 44 günlük müharibədə Elməddinin komandiri şəhid olsa da, onu döyüş mövqeyindən çıxarıb. Komandirinin nəşinin düşmənin əlinə keçməyə qoymayıb.
Şəhidin qardaşı Elvin Vəkilov isə söyləyir ki, qardaşı torpaqlarımızın işğaldan azad ediləcəyi günü hər zaman səbirsizliklə gözləyib. Müharibədə döyüşlərə sevinərək qatılıb. “Qardaşım Vətənə çox bağlı idi. Deyirdi ki, “ermənilər azərbaycanlıları dəfələrlə dədə-baba torpaqlarımız olan Qərbi Azərbaycanımızdan deportasiya ediblər. Birinci Qarabağ müharibəsi zamanı işğal və vəhşiliklər törədiblər. Biz bu işğalla barışa bilmərik”. Barışmadı da, ən uca zirvə olan şəhidlik zirvəsinə yüksəldi. Elməddinlə fəxr edirəm”, - deyə şəhid qardaşı bildirir.
Prezident İlham Əliyevin sərəncamları ilə Elməddin Vəkilov ölümündən sonra 3-cü dərəcəli “Vətənə xidmətə görə” ordeni, “Vətən uğrunda”, “Kəlbəcərin azad olunmasına görə” medalları ilə təltif olunub. Həmçinin “Şücaətə görə” medalına layiq görülüb.
Bölmənin digər xəbərləri
