Qobustan rayonunda taxıl zəmilərinin üçdəbir hissəsindən çoxu biçilib
Qobustan, 4 iyul, AZƏRTAC
Qobustan rayonunda taxıl biçini kampaniyası davam edir və artıq 12 min hektardan çox sahənin məhsulu yığılıb.
Rayon Dövlət Aqrar İnkişaf Mərkəzindən AZƏRTAC-ın bölgə müxbirinə bildirilib ki, cari ildə 31 min hektar zəmi biçiləcək. Hazırda hər gün sahələrə 50-dən çox kombayn çıxarılır. Bir sıra ərazilərdə, o cümlədən Ərəbqədim, Şıxzərli, Poladlı, Təklə, Yekəxana və Ərəbşahverdi ərazi dairələrində taxıl biçini başa çatıb. Hazırda rayonda bütün qüvvələr taxılın tez və itkisiz biçilməsi üçün səfərbər olunublar.
Qeyd edək ki, bir sıra ərazilərdə fermerlər yaxşı göstəricilərə nail olublar. Belə ki, Dərəkənd kəndindən fermer Eldar İbrahimov 85 hektar sahədən orta hesabla 35 sentner, Qobustan şəhərindən Muxtar Kulyayev 65 hektar sahədən 30 sentner məhsul əldə ediblər. Onlar, eləcə də taxılçılıqla məşğul olan və biçini başa çatdıran digər fermerlər yay şumunun çıxarılmasına başlayıblar.
Bölmənin digər xəbərləri
