Qobustanlılar 20 Yanvar faciəsi qurbanlılarının xatirəsini yad etdilər
Qobustan, 21 yanvar (AZƏRTAC). Qobustanda 20 Yanvar faciəsinin iyirmi dördüncü ildönümü kütləvi tədbirlərlə qeyd olunmuşdur.
AZƏRTAC xəbər verir ki, yanvarın 20-də səhər rayon rəhbərləri, idarə, müəssisə və təşkilatların, ictimaiyyətin çoxsaylı nümayəndələri Şəhidlər Xiyabanına gələrək abidənin önünə çiçəklər qoymuş, torpaqlarımızın bütövlüyü, vətənimizin azadlığı uğrunda canından keçmiş faciə qurbanlarının əziz xatirəsini ehtiramla yad etmişlər.
Rayon icra hakimiyyətində keçirilən toplantıda çıxış edənlər iyirmi dörd il bundan əvvəl Bakıda əliyalın insanlara qarşı törədilən amansızlığı XX əsr boyu xalqımıza qarşı aparılan düşünülmüş, məkrli siyasətin növbəti təzahürü kimi səciyyələndirmişlər. Natiqlər bu qanlı hadisənin əsl qətliam olduğunu söyləmişlər.
Çıxışlarda faciə qurbanlarının arzularının çin olduğu -- vətənimizin öz azadlığına, suverenliyinə qovuşduğu, sürətli inkişafı, güclü ordusu ilə hər birimizin fəxr edə biləcəyi dövlətə çevrildiyi diqqətə çatdırılmışdır. Habelə, vurğulanmışdır ki, Prezident, Ali Baş Komandan İlham Əliyevin rəhbərliyi ilə işğal altında olan torpaqlarımızın da azad ediləcəyi gün heç də uzaqda deyil.
Sonda rayon mədəniyyət işçilərinin ifasında 20 Yanvar faciəsinə həsr edilmiş ədəbi-bədii kompozisiya göstərilmişdir.
Bölmənin digər xəbərləri
