Quba və Bərdə rayonlarında peşə hazırlığı mərkəzləri açılacaq
Bakı, 16 avqust, AZƏRTAC
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi (DMA) tərəfindən Quba və Bərdə rayonlarında peşə hazırlığı mərkəzlərinin istifadəyə verilməsi planlaşdırılır.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a bildiriblər ki, məqsəd həmin bölgələrdə işsiz və işaxtaran vətəndaşlar üçün müasir tələblərə uyğun peşə hazırlığı infrastrukturunun formalaşdırılması, bu sahədə xidmətin keyfiyyətinin və bölgədə yaşayan müvafiq şəxslərə əlçatanlığının artırılmasıdır. Agentlik tərəfindən, həmçinin mövcud peşə hazırlığı mərkəzlərinin maddi-texniki bazasını və idarəetmə sistemini təkmilləşdirmək, peşə hazırlığı kurslarının beynəlxalq standartların tələb və şərtlərinə uyğun təşkil etmək hədəflənib. Bununla yanaşı, peşə hazırlığı prosesinin rəqəmsallaşdırılması, elektron dərslik və dərs vəsaitlərinin hazırlanması nəzərdə tutulur.
2030-cu ilədək DMA-nın nəzdində regional peşə hazırlığı mərkəzlərinin sayının 10-a çatdırılması planlaşdırılır.
Bölmənin digər xəbərləri
