Qubernator: Çerniqovun bərpasında, humanitar yardımlarda azərbaycanlılar da fəal iştirak edirlər
Çerniqov, 1 may, AZƏRTAC
Ukrayna Rusiya ilə sərhəd bölgəsində baş verə biləcək təkrar hücumun qarşısını almaq məqsədilə istehkamların qurulması tədbirlərini genişləndirir.
Bunu AZƏRTAC-a müsahibəsində Çerniqov vilayəti hərbi administrasiyasının rəhbəri, qubernator Vyaçeslav Çaus söyləyib.
“Sərhəd bölgəsi mütəmadi olaraq atəşə tutulur. Yaşayış məntəqələrinin sayından və adamlardan danışırıqsa, 11 mindən çox əhalisi olan 34 yaşayış məntəqəsi daim rusların atəşi altındadır. İldə cəmi bir neçə gün atəş səsləri eşidilmir. Digər günlərdə düşmən artilleriya, çoxsaylı reaktiv raket sistemləri və minaatanlar ilə sərhədi daim atəş altında saxlayır. Son vaxtlar Rusiya aviasiya vasitələrindən də istifadə etməyə başlayıb və Çerniqov sərhəd bölmələrinə idarəolunan aviabombalar atılır. Təbii ki, Rusiya mülki infrastruktura zərbələr endirir və çox təəssüf ki, dinc əhali həlak olur.
Sərhədin o tayında olan qüvvələrdən ikinci hücum üçün təhlükə görmürük. Ancaq yenidən toplaşmaq və hücuma hazır olmaq üçün çox vaxt lazım deyil. Ona görə biz də hazırlaşırıq. Düşmənin ərazimizdən geri çəkildiyi ötən ilin aprel ayının ilk günlərindən başlayaraq biz hər gün istehkamları möhkəmləndirir, ərazini müdafiəyə hazırlayırıq”, - deyə Çaus əlavə edib.
Onun sözlərinə görə, vilayət ərazisinin üçdə iki hissəsi işğal altında olduğu zaman 12 mindən çox obyektə ziyan dəyib. Bunların 99 faizi mülki infrastruktur obyektləridir. Ən əsası, həyati vacib olan mənzillər, fərdi evlər, binalar, xəstəxanalar, təhsil müəssisələri dağıdılıb. Bölgənin işğalı zamanı və sonradan Çerniqovda ümumilikdə 700-ə yaxın insan öldürülüb. Bunlar birbaşa itkilərdir. İşğal zamanı şəraitsizlik səbəbindən təbii ölümlərin sayı da bir neçə dəfə artıb.
Etnik azərbaycanlıların Çerniqovun müdafiəsində və bərpasında fəal iştirak etdiklərini bildirən Çaus deyib: “2022-ci ilin mart ayı göstərdi ki, Çerniqov vilayətinin bütün sakinləri bölgənin müdafiəsində mümkün qədər dəstək veriblər. Kimisi əlinə silah alıb, kimisi isə ərzaq yardımı edib, Ukrayna Silahlı Qüvvələrinə ianə verib, yardım göstərib. Bu işlərdə azərbaycanlılar və Azərbaycan diasporu da iştirak edib. Həqiqətən hər kəs həm fəal hərbi mərhələdə, həm də müharibədən sonrakı dövrdə Çerniqov vilayətinin bərpasına başlayanda bölgəyə çox fəal kömək edib”, - deyə qubernator bildirib.
Çaus qeyd edib ki, müharibə başlayandan sonra vilayəti tərk edənlərin bir qismi artıq evlərinə qayıdıb və proses davam edir.
Emil Hüseynli
AZƏRTAC-ın xüsusi müxbiri
Çerniqov
Bölmənin digər xəbərləri
