Qüdrətli Azərbaycan – yenilməz gənclik - Açıqlama
Bakı, 16 oktyabr, AZƏRTAC
Ötən 20 ildə Prezident İlham Əliyevin həyata keçirdiyi strategiyanın prioritetləri arasında idman siyasəti önəmli yerlərdən birini tutub. Prezidentin qeyd etdiyi kimi, idmana olan diqqət və qayğı hər bir ölkənin dövlət siyasəti olmalıdır. Bu, Azərbaycanda belədir. Uğurlarımızın təməlində məhz dövlət siyasəti dayanır.
Bu sözləri AZƏRTAC-a açıqlamasında idman siyasəti üzrə şərhçi, Azərbaycan Alpaqut Federasiyasının prezidenti Qüdrət Nuriyev deyib.
O qeyd edib ki, dövlətimizin başçısı İlham Əliyev prezidentliyinin ilk illərindən etibarən bütün sahələrdə olduğu kimi, idman sahəsində də böyük uğurlar qazanılır. İdman siyasətinin düzgün müəyyən olunması nəticəsində ötən illər ərzində Azərbaycan həm də güclü idman ölkəsi kimi tanınıb, həm də beynəlxalq idman ailəsində layiqli yerini tutub.
Ekspert idmana dövlət tərəfindən göstərilən dəstəyin, dayanıqlı xarakter alan müsbət idman nəticələrinin, uğurların və qələbələrin beynəlxalq qurumların diqqətini cəlb etdiyini, onlar tərəfindən də yüksək qiymətləndirildiyini bildirib.
“Şübhəsiz, bu sahədə böyük uğurların təməlini Ümummilli Lider Heydər Əliyev tərəfindən əsası qoyulmuş siyasi kurs təşkil edir. Məhz 1993-cü ildə Ulu Öndərimizin hakimiyyətə qayıdışından sonra ölkəmizdə digər sahələr kimi, idman da böyük sürətlə inkişaf etməyə başlayıb. Azərbaycan Prezidenti, Milli Olimpiya Komitəsinin Prezidenti İlham Əliyev tərəfindən uğurla davam etdirilən siyasi kurs bu gün öz gözəl nəticələrini verməkdədir.
Bu gün düşmən işğalından azad edilmiş ərazilərdə beynəlxalq yarışların təşkili xüsusi diqqət mərkəzindədir və bunun çox böyük tarixi əhəmiyyəti var. Çünki azad edilmiş ərazilərin canlandırılması, həmin yerlərə insanların, ümumilikdə həyatın qayıtması prosesi çox sürətlə gedir. Uzun illər düşmən tərəfindən xarabazara çevrilmiş torpaqlarımızda Azərbaycanın tarixi Zəfərindən sonra genişmiqyaslı quruculuq-bərpa işləri aparılır. Belə bir zamanda bu bölgələrdə beynəlxalq idman yarışlarının, tədbirlərin keçirilməsi həm də rəmzi məna daşıyır”, - deyə o qeyd edib.
Qüdrət Nuriyevin sözlərinə görə, Azərbaycanda idmanın inkişafını şərtləndirən amillərdən biri də ölkənin müasir idman infrastrukturuna malik olmasıdır. İndi nəinki Bakıda, eyni zamanda, bütün regionlarımızda ən yüksək standartlara cavab verən müasir Olimpiya İdman kompleksləri tikilir, idman mərkəzləri fəaliyyətini uğurla davam etdirir. İdmanın dövlətimizin xüsusi diqqət və qayğısı ilə əhatə olunması minlərlə yeniyetmə və gəncin hərtərəfli sağlam yetişməsinə, milli ruhda tərbiyə olunmasına geniş imkanlar yaradır.
“Prezident İlham Əliyev oktyabrın 15-də - xalqımız üçün çox əlamətdar olan bir gündə Xankəndidə, Sərsəng su anbarının ərazisində, Ağdərə və Xocalı şəhərlərində, eləcə də Əsgəran qəsəbəsində Azərbaycanın Dövlət Bayrağını ucaltdı. Dövlətimizin başçısının Xankəndiyə səfəri zamanı çıxışında “Bu gün burada olmağımızın əsas səbəbkarı Azərbaycan xalqıdır, Azərbaycan övladıdır. Elə bir gənc nəsil yetişdirdik ki, Vətən, torpaq uğrunda ölümə getməyə hazır idi və ölümə də gedirdi” fikirləri xalqımızı qürurlandırdı”, - deyən ekspert vurğulayıb ki, bəli, 44 günlük şanlı Vətən müharibəsində gənclərimiz torpağa, yurda nə qədər bağlı olduqlarını bir daha nümayiş etdirdilər. Prezident İlham Əliyevin “İrəli, Azərbaycan əsgəri!” çağırışına cavab verən igid oğul və qızlarımız böyük ruh yüksəkliyi ilə silaha sarılaraq düşmən tapdağında olan torpaqlarımızı azad etdilər. Yazdığı yeni tarixlə Azərbaycan əsgəri qürur və milli ləyaqətimizi özümüzə qaytardı. Bu gün gənclərimizin hər biri öz fəaliyyətində bu möhtəşəm Zəfərə layiq olmağa çalışırlar. Onlar beynəlxalq arenalarda keçirilən yarışlarda qalib ölkənin idmançıları kimi böyük inamla mübarizə aparır, yüksək nəticələr qazanırlar. Təsadüfi deyil ki, Vətən müharibəsindən ötən illərdə müxtəlif idman növləri üzrə dünya, Avropa çempionatlarında idmançılarımız böyük uğurlara imza atıblar.
“Müstəqil Azərbaycan dövlətinin memarı və qurucusu Ulu Öndər Heydər Əliyevin bəyan etdiyi kimi, həyat inkişaf edir, nəsillər nəsilləri əvəz edir. Prezident İlham Əliyevin rəhbərliyi ilə bölgənin liderinə çevrilən, dünyada böyük nüfuz sahibi olan qüdrətli Azərbaycandan güc alan bugünkü nəsil yenilməzdir”, - deyə Q.Nuriyev əlavə edib.
Bölmənin digər xəbərləri
