Qusarda keçirilən regional konfrans başa çatıb
Bakı, 19 iyun, AZƏRTAC
İyunun 19-da “Dini maarifçilik işinin təşkili: ənənə və müasirliyin vəhdəti” mövzusunda Qusarda keçirilən regional konfrans işini panel sessiyalarla davam etdirib.
Dini Qurumlarla İş üzrə Dövlət Komitəsindən AZƏRTAC-a bildirilib ki, konfransın “Azərbaycanda ənənəvi dini mühit və ona qarşı təhdidlər” mövzusuna həsr olunan birinci panel sessiyasında çıxış edən Komitənin sədr müavini Gündüz İsmayılov Azərbaycanda formalaşmış ənənəvi dini mühitin cəmiyyətin mənəvi dayağı olduğunu qeyd edib. Dünyada İslam dinini radikalizmə sürükləmək meyillərinin artması, bəzi qüvvələrin dini məqsədli şəkildə siyasiləşdirməsi, terrorla əlaqələndirməsi cəhdlərindən bəhs edərək, maarifləndirmə işinin vacibliyini vurğulayıb.
Digər çıxış edənlər İslamın mənəvi və intellektual mədəniyyət nümunəsi kimi müasir çağırışlara cavab verə biləcək potensiala malik olduğunu bildiriblər. Dini radikalizmin yalnız ideoloji deyil, həm də psixoloji və sosial amillərlə bağlı kompleks bir fenomen olduğu vurğulanıb. Qeyd edilib ki, dini biliklərin səthi qavranılması və sosial ədalətsizlik kimi amillər radikal düşüncələrin yayılmasına zəmin yaradır.
“Dini radikalizmin yaranma səbəbləri və ictimai təsirləri” mövzusunda keçirilən ikinci paneldə çıxış edən Azərbaycan İlahiyyat İnstitutunun rektoru Aqil Şirinov dini radikallığın əsas səbəbləri sırasında yanlış dini təfsirlər, sosial ədalətsizlik və mənəvi boşluğu qeyd edib. O, bu fəsadlarla mübarizənin əsas yolunun düzgün dini maarifləndirmə və elmi əsaslara söykənən dini düşüncə olduğunu vurğulayıb.
Digər natiqlər bildiriblər ki, dini radikalizmin yayılmasında təkcə daxili psixoloji və sosial səbəblər deyil, eyni zamanda, xarici geosiyasi maraqlar da mühüm amildir. Bu maraqlar dini kimliyi manipulyasiya vasitəsinə çevirərək, cəmiyyətləri zəiflətməyə, daxili sabitliyi pozmağa yönəlib. Həmçinin dini radikalizmin yaranma səbəbləri və onunla mübarizə yolları barədə fikirlər bölüşülüb.
Regional konfransın yekununda çıxış edən Dini Qurumlarla İş üzrə Dövlət Komitəsinin sədri Ramin Məmmədov dini maarifçilik fəaliyyətinin əsas hədəfləri barədə danışıb. Bildirib ki, dövlət-din münasibətləri haqqında insanlarda ictimai konsensusa əsaslanan aydın təsəvvürün yaradılması, milli birlik, həmrəylik ideyalarının təşviqi, o cümlədən tarix, ənənələr, mədəni və mənəvi dəyərlər üzərində milli kimliyin formalaşdırılması, mənəvi-əxlaqi dəyərlərin cəmiyyətin bütün təbəqələri tərəfindən qəbul edilən və təqdir olunan vahid prinsiplərinin müəyyən edilməsi əsas istiqamətlər sırasında yer alır. Komitə sədri vurğulayıb ki, din anlayışının bəzi dairələr tərəfindən ideoloji təhdid aləti kimi istifadə edilməsi təcrübəsi barədə cəmiyyətin məlumatlandırılması, bu cür hallara qarşı mübarizə metodlarının təqdim edilməsi, habelə ənənələr, müasir çağırışlar əsasında dövlət və dinin funksiyaları arasında sərhədləri dəqiq təyin edən ictimai münasibətlər sisteminin formalaşdırılması mühüm amillərdəndir.
Qeyd edək ki, Komitənin təşkilatçılığı ilə keçirilən regional konfransda müvafiq dövlət qurumlarının nümayəndələri, eləcə də Qusar, Xaçmaz, Quba, Şabran və Siyəzən rayonlarından olan din xadimləri iştirak ediblər.
Bölmənin digər xəbərləri
