“Rafale” üçün yaxşı və pis xəbər: “F-35” ilə rəqabət çətindir
Paris, 25 aprel, AZƏRTAC
“Dassault Aviation” şirkətinin “Rafale” təyyarəsi Hindistanda güclü maraq yaradır, lakin Belçika üstünlüyü hələ də Amerika “F-35” təyyarəsinə verir.
AZƏRTAC BFMTV televiziya kanalına istinadla xəbər verir ki, Fransa və Hindistan arasında böyük saziş bağlanmaq üzrədir. Yeni Dehli hava imkanlarını gücləndirmək üçün əlavə 40 “Rafale” təyyarəsi almağı düşünür. Sövdələşmə baş tutarsa, bu iki ölkə arasında strateji tərəfdaşlıqda yeni bir addım olacaq.
Hindistan 2006-cı ildə artıq 36 “Rafale” təyyarəsi almışdı. 1953-cü ildən Hindistan müntəzəm olaraq Fransanın aviasiya sənayesinə müraciət edir. “Ouragan”, “Mystère IV”, “Alize”, “Jaguar”, “Mirage 2000” və indi “Rafale” təyyarəsi ilə siyahı davam edir. Stokholm Beynəlxalq Sülh Araşdırmaları İnstitutunun (SIPRI) məlumatına görə, 2020-2024-cü illərdə Fransa Hindistana 28 % silah ixrac edib.
Avropa, xüsusilə Belçika Amerika təyyarələrinə üstünlük verir. Belçikanın Baş naziri Bart De Vever bildirib ki, yeni seçim ardıcıllıq üçün zəruridir. Ölkəsi artıq 34 “F-35” təyyarəsi alıb və eyni modellə davam etmək məntiqlidir. Belçika bununla Fransanın “Rafale” və İsveçin “Gripen” təyyarələrini almağı istisna edib.
Asiyadakı uğur və Avropadakı istəksizlik arasındakı ziddiyyət “Rafale”ın Amerika təyyarələrinin üstünlük təşkil etdiyi qlobal döyüş təyyarələri bazarında üzləşdiyi şiddətli rəqabəti göstərir.
Bölmənin digər xəbərləri
