Rayan Giqqz bir klubda ən çox kubok qazanan futbolçudur
Bakı, 7 may, AZƏRTAC
İngiltərənin “Mançester Yunayted” klubunun sabiq yarımmüdafiəçisi Rayan Giqqz bir komandada ən çox kubok qazanan futbolçudur.
AZƏRTAC xəbər verir ki, hazırda Uels milli komandasını çalışdıran 45 yaşlı mütəxəssis Mançester təmsilçisinin heyətində 36 kubok qazanıb. Uelsli mütəxəssis bu nəticə ilə bir klubda ən çox kubok qazanmağı bacarmış futbolçu olub.
Bir klubda ən çox kubok qazanan ikinci futbolçu “Barselona”nın argentinalı hücumçusu Lionel Messidir. O, Kataloniya klubunun heyətində 34 kuboka sahib olub. Messinin komanda yoldaşı ispaniyalı yarımmüdafiəçi Andres İniesta isə siyahıda üçüncüdür. Yarımmüdafiəçi “Barselona” təmsilçisinin heyətində 32 kuboku başı üzərinə qaldırıb.
İlk beşliyi “Barselona”nın yarımmüdafiəçisi Serxio Busqest (27 kubok) və İtaliyanın “Milan” klubunun sabiq kapitanı Paolo Maldini (26 kubok) qapayırlar.
Qeyd edək ki, Rayan Giqqz 1990-cı ildən 2014-cü ilədək “Mançester Yunayted”in formasını geyinib. O, “Mançester Yunayted”də keçirdiyi 23 mövsümdə 13 Premyer Liqa çempionluğu, 4 İngiltərə kuboku, 2 Çempionlar Liqası çempionluğu sevincini yaşayıb.
Bölmənin digər xəbərləri
