RƏHMAN ƏLİZADƏNİN “KOMEDİYALAR” KİTABININ TƏQDİMAT MƏRASİMİ OLMUŞDUR
AZƏRTAC xəbər verir ki, sentyabrın 26-da Teatr Xadimləri İttifaqında əməkdar incəsənət xadimi, Dövlət Gənclər Teatrının baş rejissoru yazıçı - dramaturq Rəhman Əlizadənin “Komediyalar” kitabı təqdim edilmişdir.
Ədəbiyyat və incəsənət xadimlərinin iştirak etdikləri tədbirdə Dövlət Gənclər Teatrının quruluşçu rejissoru Ağalar İdrisoğlu Rəhman Əlizadənin həyat və yaradıcılığı haqqında məlumat vermişdir.
Bildirilmişdir ki, Azərbaycan Dövlət İncəsənət İnstitutunu bitirən R. Əlizadənin “Kəndimizin narları”, “Dadaşbala əməliyyatı”, “Hamam-hamam içində”, “Doğmalar” komediyaları Şəki, Sumqayıt, Gəncə Dövlət dram teatrlarının səhnələrində tamaşaya qoyulmuşdur. Dramaturqların 1988-ci ildə Moskvada keçirilmiş “Zaman və Qəhrəman” müsabiqəsində onun “Sabah çoxdan başlanıb” pyesi üçüncü mükafata layiq görülmüşdür. Müxtəlif teatrların səhnələrində əsərləri tamaşaya qoyulmuşdur.
Bakı Şəhər Mədəniyyət və Turizm İdarəsinin rəisi Əlikram Əliyev R. Əlizadənin müxtəlif illərdə qələmə aldığı “Don Kixot Abşeronski”, “Bəxtimin kələyi”, “Maymaq”, “Ay dəli...”, “Laləli düz” və digər komediyalarının Dövlət Gənclər Teatrının səhnəsində uğurla tamaşaya qoyulduğunu, dramaturqun müxtəlif dövlət mükafatlarına layiq görüldüyünü bildirmiş, ona fəxri diplom təqdim etmişdir.
Rəhman Əlizadə ona göstərilən qayğı və diqqətə görə dostlarına, tədbirin təşkilatçıları və iştirakçılarına minnətdarlığını bildirmişdir.
Sonda Dövlət Gənclər Teatrının aktyorlarının ifasında dramaturqun “Dünyanın axırı” tamaşası nümayiş etdirilmişdir.
Bölmənin digər xəbərləri
