“Reno” komandası yük maşınının qəzaya uğraması barədə bəyanat verib
Bakı, 29 iyul, AZƏRTAC
Formula 1 yarışlarının “Reno” komandasının mətbuat xidməti bu komandanın yük maşınlarından birinin yol qəzasına uğraması barədə rəsmi bəyanat verib.
AZƏRTAC xəbər verir ki, həmin yük maşını Almaniyanın “Hokkenhaymrinq” avtodromundan Macarıstan Qran-Prisinə gedən yolda xəndəyə düşüb.
Komandanın bəyanatında deyilir: “Biz təsdiq edirik ki, komandanın yük maşını Macarıstanda Dyer yaxınlığında M1 trasında baş vermiş yol-nəqliyyat hadisəsinin iştirakçısı olub. Maşının sürücüsü yol hərəkəti qaydalarını pozmayıb, o, ciddi zədə almayıb və huşu üstündədir. Sürücü əlavə yoxlamalardan keçmək üçün xəstəxanaya çatdırılıb. Başqa nəqliyyat vasitələri bu hadisədə iştirak etməyib”.
Bəyanatda yük maşınının içərisində hansı avadanlığın olması və onun zədələnib-zədələnməməsi dəqiqləşdirilmir.
Formula 1 Macarıstan Qran-Prisi qarşıdakı istirahət günlərində, avqustun 2-dən 4-dək keçiriləcək.
Bölmənin digər xəbərləri
