RESPUBLİKA BAŞ PROKURORLUĞU MƏTBUAT KONFRANSI KEÇİRMİŞDİR
Baş prokurorun müavini Eldar Nuriyev ölkəmizdə vətəndaşların söz azadlığının, kütləvi informasiya vasitələrinin sərbəst fəaliyyət göstərməsinin təmin olunması istiqamətində ümummilli lider Heydər Əliyevin və ulu öndərin siyasi xəttinin layiqli davamçısı Prezident İlham Əliyevin fərmanları ilə təsdiq olunmuş qanunları və digər normativ sənədləri diqqətə çatdırmışdır. Natiq prokurorluq orqanlarının işində şəffaflığın təmin edilməsi və media nümayəndələri ilə əlaqələrin genişləndirilməsi məqsədi ilə baş prokuror tərəfindən 2005-ci ilin iyununda müvafiq əmrin imzalandığını, eləcə də Naxçıvan Muxtar Respublikası və Azərbaycan Respublikası Hərbi prokurorluqlarında KİV-lərlə iş üzrə yeni ştatların təsis olunduğunu qeyd etmişdir. Bildirilmişdir ki, ötən il təşkilatın mətbuat xidmətinin 80 məlumatı KİV-də dərc olunmuş, jurnalistlərin 1000-dən artıq sualına cavab verilmişdir. E.Nuriyev qurumda çalışan əməkdaşların sayı, elmi dərəcəsi, yaşı haqqında da qısa məlumat vermiş, 2005-ci ildə test imtahanı vasitəsilə baş prokurorluğa 32, Naxçıvan MR prokurorluğuna isə 15 yeni əməkdaşın qəbul olunduğunu söyləmişdir.
Tədbirdə baş prokurorluğun müraciətlərə baxılması idarəsinin rəisi Behbud İsmayılov və ictimaiyyətlə əlaqələr şöbəsinin rəisi Eldar Əfəndiyev 2005-ci ildə vətəndaşlardan təşkilata daxil olmuş müraciətlər, onlara baxılması və təmin edilməsi haqqında geniş məlumat vermişlər. Bildirilmişdir ki, keçən il baş prokuror Lənkəran şəhərində Astara, Lerik, Masallı, Yardımlı və digər rayonların, Əli Bayramlı şəhərində Sabirabad, Salyan, Saatlı və b. rayonların, Yevlaxda isə Ucar, Zərdab və digər rayonların sakinlərini qəbul etmişdir. Prokurorluq orqanlarında aparılan islahatların məntiqi nəticəsi kimi, təşkilatda bütün gün ərzində fəaliyyət göstərən “qaynar xətt”in yaradıldığı da diqqətə çatdırılmışdır.
Sonda jurnalistlərin çoxsaylı sualları cavablandırılmışdır.
