“Reuters”: Tramp Britaniyanın Çin ilə yaxınlaşmasını “təhlükəli” adlandırıb
Bakı, 30 yanvar, AZƏRTAC
Böyük Britaniyanın Baş naziri Kir Starmerin Çinə səfəri zamanı Pekin ilə münasibətlərin yenidən qurulmasının iqtisadi faydalarını təriflədiyi bir vaxtda, ABŞ Prezidenti Donald Tramp bu əməkdaşlığın “təhlükəli” olduğunu bildirib. AZƏRTAC xəbər verir ki, bu barədə məlumat verən “Reuters” agentliyinə görə, Qərb liderləri Trampın təzyiqlərindən narahat olduqları bir vaxtda, Starmer Çinə səfər edən sonuncu liderdir.
Cümə axşamı günü Çinin Sədri Si Cinpin ilə üç saatlıq danışıqlarda Britaniya lideri futbol və Şekspiri müzakirə edərkən, habelə bazara çıxışın yaxşılaşdırılması, aşağı tariflər və investisiya müqavilələri ilə iki ölkə arasında daha sıx münasibətlər qurmağa çağırıb. Lakin Vaşinqtonda London və Pekinin daha yaxın əlaqələri ilə bağlı sualları cavablandıran Tramp bildirib: “Bəli, bunu etmək onlar üçün çox təhlükəlidir”. O, Kennedi Mərkəzində “Melaniya” filminin premyerasından əvvəl jurnalistlərə danışarkən həmin təhlükənin nədən ibarət olduğuna aydınlıq gətirməyib.
Aprel ayında Çinə səfər etməyi planlaşdıran Tramp Kanadanın Baş naziri Mark Karninin son səfəri zamanı Pekinlə iqtisadi müqavilələr bağlamasından sonra qonşu ölkəni yüksək tariflər tətbiq etməklə hədələmişdi.
Britaniya Baş nazirinin sözçüsü və Çin Xarici İşlər Nazirliyi Trampın bəyanatını şərh etməyib.
Donald Trampın bəyanat verdiyi dəqiqələrdə Kir Starmer Çin paytaxtında keçirilən Böyük Britaniya-Çin Biznes Forumunun iclasında Si Cinpin ilə çox səmimi görüşlərinin “əsl irəliləyiş” təmin etdiyini bildirib. O, vizasız səyahət və viski tariflərinin aşağı salınması ilə bağlı razılaşmaları həqiqətən vacib başlanğıc, münasibətlərdə tərəqqinin rəmzi kimi qiymətləndirib.
Baş nazir Starmer Şanxayın Maliyyə Mərkəzinə getməzdən əvvəl Çinin avtomobil istehsalçısı “Chery” şirkətinin baş icraçı direktoru Yin Tongyue ilə görüşüb və yeni layihəni elan edib. Bu layihə Liverpul şəhərində kommersiya avtomobilləri bölməsi üçün tədqiqat və inkişaf mərkəzi açmağı planlaşdırır.
Ekspertlər bildirirlər ki, mərkəzçi solçu Leyborist hökumətinin vəd etdiyi iqtisadi artımı təmin etməkdə çətinlik çəkən Starmer dünyanın ikinci ən böyük iqtisadiyyatı ilə münasibətlərin yaxşılaşdırılmasını prioritet olaraq təyin edib.
Bölmənin digər xəbərləri
