Riad Cəbrayılov - On illik vokal sənəti, solo konsertlər və çoxsaylı layihələr VİDEO
“İlin Gənci” mükafatı fəaliyyətimə verilən qiymət, həm də gələcək üçün məsuliyyətdir
Bakı, 9 fevral, Gülay Nəzərova, Şövqi Əzizov, AZƏRTAC
Gənclərin yaradıcılığa və sənətə olan sevgisi istedadla yanaşı, cəsarət, axtarış və özünü ifadə ehtiyacı ilə də formalaşır. Musiqi və ictimai fəaliyyət bu sevginin ən canlı təzahürlərindəndir. Bu gün Azərbaycan gəncliyi sənəti sadəcə bir peşə kimi deyil, cəmiyyətə təsir göstərmək, dəyərlər yaratmaq və öz sözünü demək vasitəsi kimi qəbul edir. Məhz bu yanaşma yaradıcılığı sosial məsuliyyətlə birləşdirən, istedadı faydaya çevirən gənclərin formalaşmasına zəmin yaradır. Belə gənclərdən biri də milli vokal sənətini ictimai fəaliyyətlə uğurla birləşdirən “İRƏLİ” İctimai Birliyinin baş katibi, vokal ifaçısı, “İlin Gənci” mükafatının qalibi Riad Cəbrayılovdur.
AZƏRTAC-ın müxbiri ilə söhbətində gənc istedad vokal sənəti üzrə yaradıcılıq fəaliyyətindən, həmçinin ictimai və mədəni layihələrdə iştirakından danışıb.
O, 2016-2020-ci illərdə Azərbaycan Milli Konservatoriyasının “İfaçılıq” fakültəsində “Milli vokal” ixtisası üzrə bakalavr təhsili alıb. Onun sözlərinə görə, tələbəlik illəri həm peşəkar musiqiçi baxımından formalaşma dövrü, həm də ictimai fəaliyyətə atıldığı mühüm mərhələ olub.
“Təhsil aldığım illərdə anladım ki, sənət təkcə səhnədə ifa etməkdən ibarət deyil. Sənət insanlarla işləmək, gəncləri bir ideya ətrafında birləşdirmək və onları inkişaf prosesinə cəlb etməkdir”, – deyə o vurğulayıb.
Tələbəlik dövründən ictimai və yaradıcılıq fəaliyyətinə başlayan Riad Cəbrayılov Azərbaycan Milli Konservatoriyasının Tələbə Gənclər Təşkilatının sədri kimi fəaliyyət göstərib. Bu müddət ərzində gənclərin mədəni mühitə daha fəal cəlb olunması, yaradıcılıq potensiallarının üzə çıxarılması məqsədilə bir sıra layihələr həyata keçirilib.
Hazırda “İRƏLİ” İctimai Birliyində baş katib vəzifəsində çalışan Riad Cəbrayılov paralel olaraq səhnə yaradıcılığı ilə də məşğuldur. O bildirib ki, artıq 10 ildən çoxdur ictimai sahədə aktiv fəaliyyət göstərir və gənclərin iştirakı ilə müxtəlif layihə və tədbirlərin təşkilində yaxından iştirak edir. Onun sözlərinə görə, milli vokal üzrə musiqi fəaliyyəti, ictimai fəaliyyət və könüllülük bir-birini tamamlayan əsas istiqamətlərdir.
Riad Cəbrayılov ilk vokal müəllimlərindən olan Əməkdar artist Ramil Qasımovun onun formalaşmasında mühüm rol oynadığını xüsusi qeyd edib: “Düşünürəm ki, vokal ifaçılığında Ramil müəllimlə yolu kəsişən hər bir tələbəni şanslı hesab etmək olar. Onlardan biri də mənəm. Ramil müəllimin verdiyi bilik və tövsiyələr mənim yaradıcılıq yolumda əsas istiqamətverici amil olub”.
Riad Cəbrayılov ötən illərdə çıxış etdiyi iki solo konsert barədə məlumat verib: “Beynəlxalq Muğam Mərkəzində “Salam, Rişad” adlı ilk solo konsert proqramımı təqdim etmişdim. Daha sonra Azərbaycan Milli İncəsənət Muzeyində “Muzeydə musiqi” layihəsi çərçivəsində “Xoşladığım bir gecə” adlı konsertim oldu. Proqramda xalq və bəstəkar mahnılarını səsləndirmişdim”.
O, eyni zamanda “Youthvision” beynəlxalq mahnı müsabiqəsində münsiflər heyətinin üzvü kimi çıxış edərkən Azərbaycan gənclərinin yaradıcılığa və müsabiqə mühitinə marağını yüksək qiymətləndirib. Təxminən 20-25 ölkəndən olan gənclərin iştirak etdiyi bu layihənin onların tanınması baxımından əhəmiyyətli olduğunu vurğulayıb.
2026-cı ilin “İlin Gənci” mükafatına layiq görülməsi barədə danışan Riad bildirib ki, fəaliyyətin əsas motivasiyası heç vaxt mükafat olmamalıdır: “Fəaliyyət zövq almaq, inkişaf etmək və fayda vermək üçündür. Mükafat isə görülən işə verilən qiymətdir. “İlin Gənci” seçilmək böyük qürurdur və bunu həm ötən 10 ilin fəaliyyətinə verilən dəyər, həm də gələcək üçün məsuliyyət kimi qəbul edirəm”.
Onun müəllifi olduğu layihələr sırasında “İstedadlı gənclərin estrada-vokal müsabiqəsi”, “Solo gənclik”, “MədəniyyətimİZ” və “Sənətkarın dostu” kimi təşəbbüslər yer alır. Eyni zamanda “Bakı ictimai xoru” layihəsinin artıq bir layihə çərçivəsindən çıxaraq platformaya çevrildiyini bildirən Riad Cəbrayılov qeyd edib ki, bu təşəbbüs yaşından və peşəsindən asılı olmayaraq hər kəsin kollektiv ifaçılıqda iştirakına imkan yaradır.
Riad Cəbrayılov, həmçinin 2023-cü ildə Türkiyədə baş vermiş dağıdıcı zəlzələdən sonra Azərbaycan könüllüləri qrupunun tərkibində humanitar fəaliyyət göstərdiyini, həmin il ictimai fəallığına görə “İlin könüllüsü” nominasiyası üzrə təltif olunduğunu və “Davam” Gənclər Hərəkatının idarə heyətinin üzvü seçildiyini də bildirib.
O, gənclərin dövlət tərəfindən yaradılan imkanlardan xəbərdar olmasının və bu imkanlardan fəal şəkildə istifadə etməsinin vacibliyini vurğulayıb: “Hər bir gənc hədəflərinə doğru özü təşəbbüs göstərməli, özünü sınamalı və mərhələli şəkildə daha böyük məqsədlərə doğru irəliləməlidir. Kiçik addımlar atmaq, layihələrdə iştirak etmək və yeni biliklər qazanmaq yolu ilə gənclər həm şəxsi bacarıqlarını inkişaf etdirir, həm də cəmiyyət üçün faydalı fəaliyyət göstərə bilir. Mən hesab edirəm ki, uğur əldə etmək üçün həmişə aktiv olmaq, öyrənmək və cəsarətli olmaq vacibdir”.
Sonda o qeyd edib ki, artıq 10 ildən çoxdur vokal sənəti ilə məşğuldur və iki solo konsert proqramı ilə çıxış edib: “Ən böyük məqsədim kollektiv fəaliyyət mədəniyyətini gücləndirmək və gənclərin cəmiyyətə faydalı fərdlər kimi formalaşmasına töhfə verməkdir”.
Riad Cəbrayılov, yalnız vokal sənəti ilə deyil, eyni zamanda gənclərin yaradıcılıq və ictimai fəaliyyət sahəsində inkişafına verdiyi töhfələrlə seçilir. Onun fəaliyyəti göstərir ki, istedadı cəmiyyətə faydaya çevirmək mümkündür və hər bir gənc üçün ilham mənbəyidir.
Bölmənin digər xəbərləri
