Riqada 20 Yanvar şəhidlərinin xatirəsi yad edilmişdir
Riqa, 21 yanvar (AZƏRTAC). Yanvarın 20-də Latviyadakı Tələbə Gənclər Təşkilatı Bakıda yanvar faciəsi qurbanlarının xatirəsini anma mərasimi keçirmişdir. Tədbir Azərbaycanın Latviyadakı səfirliyinin köməyi ilə təşkil olunmuşdu. Matəmlə əlaqədar Azərbaycanın Riqadakı səfirliyinin qarşısında ölkəmizin dövlət bayrağı endirilmişdi.
Elə həmin gün Latviyada 20 Yanvar 1991-ci il hadisələrinin qurbanlarının - barrikada müdafiəçilərinin xatirəsi də yad edilir. Azərbaycanın Latviyadakı səfirliyinin əməkdaşları Bakıda yanvar faciəsi qurbanlarının xatirəsini də ehtiramla yad etmiş, Latviya xalqı ilə həmrəylik nümayiş etdirərək başda prezident Andres Berzinş olmaqla Latviya hökumətinin nümayəndələri ilə birlikdə barrikada müdafiəçilərinin xatirəsini yad etmiş, Azadlıq abidəsi önünə tər-çiçəklər qoymuşlar.
Qara Yanvar faciəsinin 24-cü ildönümünə həsr edilmiş anım tədbirində səfirliyin əməkdaşları, Latviyanın ali məktəblərində təhsil alan azərbaycanlı və əcnəbi tələbələr iştirak etmişlər. 1990-cı il 20 Yanvar faciəsinin 24-cü ildönümü ilə əlaqədar Azərbaycan insan hüquqları müvəkkili Elmira Süleymanovanın bəyanatının üç dildə nəşr edilmiş mətni tədbir iştirakçılarına paylanmışdır.
Azərbaycan Tələbə Gənclər Təşkilatının üzvləri Türkan Məmmədova və İrfan Əliyev qanlı 20 Yanvar faciəsi haqqında məlumat vermişlər. Qeyd edilmişdir ki, həmin gün Azərbaycan xalqı hərbi, siyasi və mənəvi təcavüzə məruz qalmış, lakin tarixi qəhrəmanlıq ənənələrinə sadiqliyini, ən ağır sınaqlara dözmək, Vətənin azadlığı və müstəqilliyi naminə canlarından keçmək əzmini bütün dünyaya nümayiş etdirmişdir. Bu dəhşətli hadisə bizim yaddaşlarımızda daim qalacaqdır.
Daha sonra 1988-ci il fevralın 28-də baş vermiş Sumqayıt faciəsi haqda məlumat verilmiş, qeyd edilmişdir ki, bu faciə SSRİ dövlət təhlükəsizlik orqanlarının, o cümlədən erməni millətindən olan cinayətkar ünsürlərin əli ilə törədilmişdir.
Azərbaycan Tələbə Gənclər Təşkilatının lideri Kamal Hüseynov 24 il bundan əvvəl ölkəmizin müstəqilliyi naminə həlak olmuş Azərbaycan gənclərinin qəhrəmanlığından danışmışdır.
Sonra latviyalı tələbələr 1991-ci il barrikada müdafiəçilərinin xatirəsi günü barədə danışmışlar. Həmin gün həm paytaxt Riqada, həm də bütün Latviyada müstəqilliyin bərpası uğrunda mübarizədə vətənpərvərlik təzahürü günü olmuşdur. 1991-ci il yanvarın 20-də sovet xüsusi təyinatlı qoşun dəstələri tərəfindən Latviya Daxili İşlər Nazirliyinə və yaxınlıqdakı əraziyə hücumlar zamanı atışma nəticəsində 4 nəfər qətlə yetirilmişdir.
Sonra “Yanvar faciəsi” adlı sənədli film nümayiş etdirilmişdir.
Nigar Cəfərli
AZƏRTAC-ın xüsusi müxbiri
Riqa
Bölmənin digər xəbərləri
