Rostislav Korobka: Azərbaycanla Ukrayna arasında istifadə olunmamış böyük potensial mövcuddur
Kiyev, 20 aprel, AZƏRTAC
Ukrayna Azərbaycanla iqtisadi əlaqələrin inkişafında maraqlıdır. İki ölkənin şirkətlərinin qarşılıqlı investisiya yatırımının artırılması istiqamətində işlər davam etdirilməlidir.
AZƏRTAC xəbər verir ki, bu fikirləri Kiyevdə səfərdə olan Azərbaycan Milli Məclisinin Azərbaycan-Ukrayna parlamentlərarası əlaqələr üzrə İşçi qrupunun nümayəndə heyəti ilə görüşdə Ukrayna Ticarət və Sənaye Palatasının vitse-prezidenti Rostislav Korobka söyləyib.
Azərbaycan dövlətinin müharibə dönəmində Ukraynaya dəstəyinin yüksək qiymətləndirildiyini vurğulayan R.Korobka bildirib: “Hazırda Rusiyanın Ukraynaya qarşı müharibəsi davam etdiyindən qarşılıqlı investisiya layihələrinin reallaşdırılmasında problemlər var. Azərbaycan və Ukraynanın iqtisadi əlaqələrində istifadə olunmamış böyük potensial mövcuddur”.
Azərbaycan-Ukrayna parlamentlərarası əlaqələr üzrə İşçi qrupunun həmsədri Rüfət Quliyev isə qeyd edib ki, azərbaycanlı iş adamları Ukraynaya sərmayələrin qoyulmasına hazırdırlar. Hər iki ölkə enerji, sənaye, kənd təsərrüfatı sahələrində birgə yeni layihələr reallaşdıra bilər.
Görüşdə tərəfləri maraqlandıran digər məsələlər barədə də fikir mübadiləsi aparılıb.
AZƏRTAC-ın xüsusi müxbiri
Kiyev
Bölmənin digər xəbərləri
