Rövşən həmişə deyirdi ki, bizim üçün öncə vətəndir, onun bütövlüyüdür -şəhid qardaşı VİDEO
Tovuz, 16 oktyabr, Ruslan Novruzoğlu, AZƏRTAC
44 günlük Vətən müharibəsi Azərbaycanın qəhrəmanlıq salnaməsinə yazılmış ən parlaq səhifələrdən biridir. Bu savaşda xalqımızın igid oğulları torpaqlarımızın azadlığı uğrunda canlarından keçərək ölməzlik zirvəsinə ucaldılar. Onlardan biri də vətənə sədaqəti, cəsarəti və fədakarlığı ilə yaddaşlara həkk olunmuş şəhid Rövşən Aydın oğlu Vəlixanovdur. Onun həyatı və döyüş yolu gənclər üçün əsl vətənpərvərlik nümunəsidir.
AZƏRTAC-ın bölgə müxbiri xəbər verir ki, Rövşən Vəlixanov gənc yaşlarından vətənə sədaqət, xalqa xidmət və torpaqlarımızın müdafiəsi kimi ali duyğularla yetişmişdir. Hərbi xidmət dövründə intizamı, cəsarəti və məsuliyyətli davranışı ilə seçilmiş, silahdaşları arasında böyük hörmət qazanmışdır.
Anası Rəfiqə Vəlixanova deyir ki, uşaqlıqdan Rövşənin arzusu hərbçi olmaq idi. “Atasının istəyi başqa peşə olsa da, oğlum özü hərb sahəsini seçdi. Ailədə üç qardaşdılar. Rövşən onların ən kiçiyi olsa da, o biri qardaşları həmişə ondan məsləhət alırdılar. Rövşən dərin düşüncəli biri idi”, - deyə şəhidin anası bildirib.
Vətən müharibəsi başlamamışdan bir neçə gün əvvəl Rövşən ailəsi ilə görüşə gəlir. Döyüşlər başlayanda isə bunu anasından gizlədir. Sonuncu dəfə isə ailəsi ilə oktyabrın 1-də telefonla əlaqə saxlayır. Yaxınlarına deyib ki, şəhid olsam məni dostumun yanında dəfn edərsiniz.
“Oğlum Rövşənlə fəxr edirəm. Onlar Azərbaycan xalqının qürur yeridir, bütün şəhidlərimiz qəhrəmandır. Özümü tək Rövşənin anası deyil, milyonların anası hesab edirəm”, - deyir R.Vəlixanova.
Bizimlə həmsöhbət olan şəhidin qardaşı Araz deyir ki, Rövşən Kəlbəcər istiqamətində döyüşlərə qatılıb. Onun hərbi ixtisası rabitəçi olub, döyüşlərdə fəal iştirak edib. “O həmişə bizimlə danışanda deyirdi ki, hər şey yaxşı olacaq. Bizim üçün öncə vətənimizin bütövlüyüdü. O, inanırdı ki, ərazi bütövlüyümüz bərpa olacaq və bu yolda da şəhid oldu”, - deyə Araz Vəlixanov bildirib.
Rövşənin müəllimi Gülnar Nəcəfova onun vətənə sonsuz sevgisindən danışıb: “Dərsdən əlavə söhbətlərdə həmişə deyirdi ki, müəllim biz öz torpaqlarımızı azad edə bilərik. Biz mütləq torpaqlarımızı xilas etməliyik. Elə dediyi də oldu. O vətən müharibəsində qaynar döyüşlərin getdiyi hissədə yaralı əsgər yoldaşlarını döyüş meydanından çıxarıb, yenidən döyüşlərə qatılıb. Şəhidlərimiz bizim qürur yerimizdir. Onları heç zaman unutmayacağıq”.
Rövşən Vəlixanov 1994-cü il oktyabrın 15-də Tovuz rayonunun Qaraxanlı kəndində anadan olub. 2001–2012-ci illərdə Fariz Hüseynov adına Qaraxanlı kənd tam orta məktəbində təhsil alıb. Subay idi. R. Vəlixanov 2012–2014-cü illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. Azərbaycan Silahlı Qüvvələrinin əsgəri olan Rövşən Vəlixanov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Murovdağın azadlığı uğrunda gedən döyüşlərdə iştirak edib. O, oktyabrın 2-də Murovdağ döyüşləri zamanı itkin düşüb. Həmin ilin dekabrın 18-də şəhid olduğu müəyyənləşib. Tovuz rayonunun Qaraxanlı kəndində dəfn olunub. Rövşən Vəlixanov ölümündən sonra "Vətən uğrunda", "Cəsur döyüşçü" və "Kəlbəcərin azad olunmasına görə" medalları ilə təltif edilib.
Rövşən Vəlixanovun adı bu gün hər bir azərbaycanlının qəlbində ehtiramla anılır. Onun igidliyi və fədakarlığı gənc nəslin vətənə sədaqət ruhunda tərbiyəsində əvəzsiz örnəkdir.
Bölmənin digər xəbərləri
