“RT France” telekanalının keçmiş rəhbərinin Fransadan çıxarılmasına qərar verilib
Paris, 30 iyul, AZƏRTAC
Fransanın Daxili İşlər Nazirliyi “RT France” telekanalının keçmiş rəhbəri və hazırda “Cnews” televiziya kanalında çıxış edən rusiyalı şərhçi Kseniya Fedorovanın ölkədən çıxarılması barədə inzibati qərar qəbul edib.
AZƏRTAC xəbər verir ki, nazirlik onun Rusiya tərəfindən aparılan dezinformasiya kampaniyalarını yaymaqla dövlətin əsas maraqlarına və ictimai asayişə təhdid yaratdığını bildirir. Qərar Paris Polis Prefekturası tərəfindən Fedorovanın vəkilinə təqdim edilib. Lakin bu, onun Fransadan çıxarıldığı anlamına gəlmir.
Fransanın “Libération” nəşrinin dərc etdiyi sənədə əsasən, hakimiyyət orqanları hesab edir ki, Fedorovanın fəaliyyəti dövlətin fundamental maraqlarına zərər vurur və onun Fransada olması ictimai asayiş üçün xüsusilə ciddi və aktual təhlükə yaradır.
Qərarda o, Fransa daxilində sabitliyi pozmaq məqsədi daşıyan və Rusiya hakimiyyəti tərəfindən idarə olunduğu iddia edilən dezinformasiya kampaniyalarının “narrativlərini” yaymaqda ittiham olunur.
Fransanın xarici işlər naziri Jan-Noel Barro may ayının sonunda Kseniya Fedorovanı “Kremlin dezinformasiyasını yayan təbliğatçısı” adlandırmışdı. Xarici İşlər Nazirliyi onu Ukrayna müharibəsi ilə bağlı Moskvanın mövqeyini təkrarlamaqda və münaqişənin davam etməsinə görə Avropa ölkələri ilə NATO-nu günahlandırmaqda ittiham edib.
Fedorova isə bu ittihamları rədd edərək, jurnalist fəaliyyətini yerinə yetirdiyini, irəli sürdüyü fikirlərin müzakirə edilə biləcəyini, lakin sadəcə narahatlıq yaratdığı üçün qadağan edilməsinin yolverilməz olduğunu bildirib.
Kseniya Fedorovanın yaşayış icazəsi 2024-cü ilin avqustunda daha 10 il müddətinə uzadılmışdı. Daxili İşlər Nazirliyi həmin qərarın qəbulunda siyasi müdaxilə olmadığını vurğulamışdı. Fedorova 2022-ci ildə Rusiyanın Ukraynaya müdaxiləsindən sonra Avropa İttifaqında yayımı qadağan edilən, daha sonra isə Fransadakı filialı 2023-cü ildə ləğv olunan “RT France” televiziya kanalına rəhbərlik edib. O, 2025-ci ildən etibarən “Cnews” və “Europe 1”də çıxış edir, “JDNews” nəşrində yazılar dərc edir və pravoslav irsinə həsr olunmuş televiziya proqramı aparır. Onun efir fəaliyyətinə görə bir sıra deputatlar Fransa Audiovizual Tənzimləmə Qurumuna (Arcom) müraciət ediblər. Bununla belə, “Canal+” və “Lagardère Radio” rəhbərliyi Fedorovanın efirdə çıxışını ifadə azadlığı və media plüralizmi prinsipləri ilə əsaslandıraraq müdafiə edib.
Bölmənin digər xəbərləri
