Rumıniyalı müşahidəçi: Azərbaycanda seçki proseduru tam normal qaydada həyata keçirildi
Bakı, 2 noyabr, AZƏRTAC
Azərbaycan Milli Məclisinə seçkilərdə müşahidəçi qismində iştirak edən Rumıniya parlamentinin nümayəndələri seçkilərin nəticələrinə dair rəylərini bildiriblər.
AZƏRTAC xəbər verir ki, “Seçkilər” Media Mərkəzində keçirilən mətbuat konfransında nümayəndə heyətinin üzvü Adrian Miroslav Merka seçkiləri Bakı və Bakıətrafı qəsəbələrdə izlədiklərini söyləyib. O, hər bir məntəqədə təşkilatçılığın yüksək səviyyədə olduğunu deyib. Deputatlığa namizədlərin nümayəndələrinin seçki qanunvericiliyinə uyğun hərəkət etdiklərini qeyd edib. Məntəqə üzvlərinin öz işlərini yüksək səviyyədə gördüklərini deyən Rumıniya parlamentinin nümayəndəsi bildirib: “Olduğumuz bütün seçki məntəqələrində seçki proseduru tam normal qaydada həyata keçirildi. Əlil və yaşlı insanlar üçün daşınan qutular təşkil olunmuşdu”.
A. M. Merka deputatlığa namizədlərin nümayəndələri və komissiya üzvləri ilə ayrı-ayrılıqda söhbət apardıqalarını söyləyib. Bildirib ki, istər iqtidar, istər müxalifət, istərsə də bitərəf namizədlərin nümayəndələri məntəqələrdə sərbəst müşahidələr apara bilirdilər. Seçki məntəqəsinin yaxınlığında da vəziyyət normal idi. Bütün bunlar onu deməyə əsas verir ki, seçkilər demokratik, şəffaf keçib. “Mən bu seçkilərdə, həmçinin Avropa ölkələri üçün yenilik ola biləcək məqamlarla da rastlaşdım. Belə ki, gözdən əlillər üçün xüsusi şərait yaradılmışdı. Onlar səsvermədən kənarda qalmamışdılar”, - deyə Rumıniya parlamentinin nümayəndəsi bildirib.
Parlamentin digər üzvləri Lillana Cobanu və Razvan Rotaru da seçkilərin azad və demokratik şəraitdə keçdiyini qeyd ediblər.
Bölmənin digər xəbərləri
