“Rumsfeld Fondu”nun icraçı direktoru: CAMCA regionu beynəlxalq birliyin mühüm hissəsidir VİDEO
Bakı, 1 oktyabr, AZƏRTAC
Dünya CAMCA-nın (Mərkəzi Asiya, Monqolustan, Cənubi Qafqaz və Əfqanıstan) uzun zamandır bildiyi və müdafiə etdiyi bir gerçəyi nəhayət anlamağa başlayır. CAMCA regionu bütövlükdə beynəlxalq birliyin son dərəcə mühüm bir hissəsidir.
AZƏRTAC xəbər verir ki, bu sözləri "Rumsfeld Fondu"nun icraçı direktoru Sarah Tonucci Bakıda keçirilən CAMCA Regional Forumunda deyib.
O bildirib ki, bu regiona və onun gələcəyinə olan sarsılmaz inamı anlamaq üçün CAMCA Şəbəkəsinin inanılmaz dərəcədə istedadlı üzvlərinə baxmaq kifayətdir: “Onların bir çoxu bu gün bizimlə buradadır, 300-dən çox insan bütün regionda və onun hüdudlarından kənarda fəaliyyət göstərərək növbəti iki gün ərzində haqqında ətraflı eşidəcəyiniz müxtəlif tədbir və təşəbbüslər vasitəsilə real və davamlı regional əməkdaşlığı inkişaf etdirmək üçün ilboyu çalışırlar. Regional istedadlardan ibarət bu şəbəkə unikal bir təşəbbüsdür. Xəzərdən Monqolustan çöllərinə qədər bütün 10 ölkəni əhatə edir. Bütün sektorlar üzrə regional öncülləri, novatorları və liderləri bir araya gətirir. Bu şəbəkə dostluq, hörmət, birgə təcrübə və bütün insanların uğuru və rifahı naminə inteqrasiya olunmuş, əməkdaşlığa söykənən CAMCA regionunun dəyərinə olan dərin inamdan qaynaqlanan möhkəm münasibətlərlə xarakterizə olunur”.
“Ən başlanğıcdan Birləşmiş Ştatların sabiq müdafiə naziri Donald Rumsfeld həmişə inanırdı ki, CAMCA-nın fəaliyyətinin əsl dəyəri Təqaüd Proqramı iştirakçıları arasında formalaşacaq münasibətlərdədir. O, dinamik regional liderlərdən ibarət qarşılıqlı dəstək şəbəkəsi inkişaf edəcəyi və ideal ssenaridə müstəqil şəkildə yaşamağa başlayacağı təqdirdə nələrin mümkün ola biləcəyini xəyal edirdi. Bu gün burada dayanaraq həmin şəbəkənin artıq mövcud olduğunu və CAMCA regionunun gələcəyinin formalaşmasında getdikcə daha mühüm rol oynamağa davam edəcəyinə əminliyimizi bildirmək böyük qürur hissidir. Əgər hələ də CAMCA şəbəkəmizin üzvləri ilə tanış olmaq imkanınız olmayıbsa, ümid edirəm ki, növbəti günlərdə bu şansı əldə edəcək və onların təcrübəsindən faydalanmaq üçün yollar tapacaqsınız. Son olaraq, Azərbaycandakı yerli ev sahiblərimizə və tərəfdaşlarımıza böyük təşəkkürümüzü bildiririk. Göstərdiyiniz qonaqpərvərliyə görə son dərəcə minnətdarıq və CAMCA ictimaiyyəti üçün yenidən Bakıya qayıtmaq həqiqətən böyük xoşbəxtlikdir", - deyə S.Tonucci qeyd edib.
Bölmənin digər xəbərləri
