RUSİYA PREZİDENTİ VLADİMİR PUTİN TÜRKİYƏYƏ SƏFƏRİ ƏRƏFƏSİNDƏ TÜRK JURNALİSTLƏRİNƏ MÜSAHİBƏ VERMİŞDİR
Prezident bildirmişdir ki, Rusiya-Türkiyə münasibətlərində yeni səhifə açılmışdır, hər iki tərəf əvvəlki stereotiplərdən imtina etmişdir. O demişdir: “Bu onunla əlaqədardır ki, dünya kökündən dəyişmişdir, qlobal dəyişikliklər isə, öz növbəsində, ölkələr arasında münasibətlərdə dəyişikliklərə gətirib çıxarır. Biz qonşuyuq və ümumi mənafelərimiz çoxdur. Əgər səylərimizi birləşdirsək, böyük nəticələrə və böyük uğurlara nail ola bilərik”.
V.Putin Rusiya ilə Türkiyə arasında ticarət-iqtisadi münasibətlərin inkişafına tərəfdar olduğunu bildirmişdir. O, iki ölkənin energetika sahəsindəki birgə fəaliyyətini yüksək qiymətləndirmiş və iqtisadiyyatın başqa sahələrində də belə əlaqələrin yaradılmasını arzulamışdır.
Rusiya Prezidenti Cənubi Qafqazda indiki vəziyyətə münasibətini bildirərək demişdir ki, bu regionda vəziyyət kənar dövlətlərin iştirakı olmadan nizama salınmalıdır. O demişdir: “Rusiya və Türkiyə Cənubi Qafqazda vəziyyətin nizama salınmasında başqalarından daha çox marağı olan dövlətlərdir. Mən tam əminəm ki, bu regionda yığılıb qalmış problemləri, həm Rusiyanın, həm Türkiyənin, eləcə də bütün regionun mənafelərini nəzərə almaqla daha səmərəli şəkildə həll etmək üçün biz heç vəchlə bir-birimizlə rəqabətə, regiondankənar dövlətlərin iştirakına yol verməməliyik”.
Putin regionda vəziyyətin nizama salınmasında Türkiyə ilə əməkdaşlığın tərəfdarı olduğunu vurğulamışdır. O demişdir: “Biz (Rusiya və Türkiyə) bu regionda nələr baş verdiyini başqalarından daha yaxşı dərk edirik və vəziyyətin nizama salınmasında da başqalarından daha çox maraqlıyıq, çünki regionda bir-birimizlə qonşuyuq”.
