RUSİYADA ƏMƏKQABİLİYYƏTLl ƏHALİ AZALIR
Bu statistika “2004-2015-ci illər üçün Rusiyanın işləyən əhalisinin sağlamlığı” proqramı layihəsində göstərilmişdir.
Layihədə deyilir: “Dövlət Statistika Komitəsinin məlumatına görə, əhalinin ümumi sayı son 12 il ərzində 5 milyon nəfər, məşğul əhalinin sayı isə 12 milyon nəfər azalmışdır. Bu o deməkdir ki, əməkqabiliyyətli şəxslər arasında ölüm halları bütövlükdə əhali arasında ölüm hallarını üstələyir. Əməkqabiliyyətli əhali arasında ölüm halları Avropa Birliyi üzrə analoji göstəricidən 4,5 dəfə yüksəkdir”.
Hər il Rusiyada ölənlərin sayı doğulanların sayından təqribən 1 milyon nəfər çox olur.
Rusiya İqtisadi İnkişaf və Ticarət Nazirliyinin proqnozuna görə, 2006-2015-ci illərdə işləyən əhalinin sayının azalması meyli qalacaq və işçi qüvvəsinin ümumi itkisi 10 milyon nəfərdən çox, yəni ildə, orta hesabla, 1 milyon nəfər olacaqdır. Proqramda deyilir ki, uzunmüddətli proqnozlara görə, 60 ildən sonra ölkə əhalisinin sayı iki dəfə azalacaqdır.
Proqramın layihəsi Rusiya Tibb Elmləri Akademiyası, Səhiyyə və Sosial İnkişaf Nazirliyi, Rusiya İctimai Sığorta Fondu və bu işdə marağı olan digər nazirliklər və idarələrlə birgə işlənib hazırlanmışdır.
