Saatlıda şəhid ailələrinə yardımlar edilmişdir
Saatlı, 21 yanvar (AZƏRTAC). Saatlı şəhərinin Heydər Əliyev prospektində ucaldılmış “Şəhidlər” abidə-kompleksinin önündə 20 Yanvar faciəsinin 24-cü ildönümü ilə bağlı anım mərasimi keçirilmişdir.
AZƏRTAC xəbər verir ki, rayonun rəhbər işçiləri, yaşlı nəslin və gənclərin təmsilçiləri, müharibə veteranları, ictimaiyyətin nümayəndələri abidə önünə gül dəstələri düzərək Azərbaycanın suverenliyi və ərazi bütövlüyü uğrunda şəhid olanların xatirəsini ehtiramla yad etmişlər. Şəhidlərin ruhuna dualar oxunmuş, 20 Yanvar faciəsinin dəhşətlərini əks etdirən ədəbi-bədii kompozisiya nümayiş olunmuşdur.
Mərasim rayon icra hakimiyyətində davam etmişdir. Çıxış edənlər 24 il əvvəl keçmiş SSRİ rəhbərliyi tərəfindən Bakı şəhərində törədilmiş qanlı faciədən söhbət açaraq 20 Yanvar hadisələrinə siyasi-hüquqi qiymət verilməsində ümummilli lider Heydər Əliyevin əvəzolunmaz xidmətlərini diqqətə çatdırmışlar.
Tədbirin sonunda şəhid ailələrinə maddi yardımlar edilmişdir.
Bölmənin digər xəbərləri
