Sahibkarlığın İnkişafı Fondu layihələrin maliyyələşdirilməsinə 2,7 milyard manatdan çox güzəştli kredit ayırıb
Bakı, 9 iyun, AZƏRTAC
Ölkəmizdə sahibkarların, xüsusilə də mikro, kiçik və orta biznes subyektlərinin maliyyə resurslarına çıxışını asanlaşdırmaq məqsədilə İqtisadiyyat Nazirliyinin Sahibkarlığın İnkişafı Fondu bir neçə mexanizm təqdim edir ki, bunlardan biri də güzəştli kreditlərdir. Sahibkarlığın İnkişafı Fondu tərəfindən bu günədək müvəkkil kredit təşkilatları vasitəsilə 41 min 300-dək layihə maliyyələşdirilib və bu məqsədlə 2,7 milyard manatdan artıq güzəştli kredit vəsaiti ayrılıb.
Fonddan AZƏRTAC-a bildirilib ki, güzəştli kreditlərin iqtisadiyyatın sahələri üzrə bölgüsündə kənd təsərrüfatı məhsullarının istehsalı və emalı layihələrinin payı 91,7 faiz təşkil edib, 6,1 faiz sənaye məhsullarının istehsalı və emalı, 1,6 faiz xidmət sahələrinin (infrastruktur, tibb, təhsil və sair) inkişafı, 0,6 faizi isə turizm sahəsində fəaliyyət göstərən sahibkarlıq subyektlərinin payına düşüb. Məbləğ üzrə kreditlərin 60,5 faizi kənd təsərrüfatı məhsullarının istehsalı və emalı, 26,1 faizi sənaye məhsullarının istehsalı və emalı, 2,2 faizi turizmin inkişafı, 11,1 faizi isə xidmət sahələrinin inkişafına yönəldilib. Güzəştli kreditlər əhalinin məşğulluq səviyyəsinin artırılmasında vacib rol oynayır. 2002-2022-ci illər ərzində verilmiş güzəştli kreditlər hesabına 177 mindən artıq yeni iş yerinin yaradılması nəzərdə tutulur. Güzəştli kreditlərdən istifadə etməklə reallaşdırılan layihələr hesabına kənd təsərrüfatı sahəsində təqribən 113 min, sənaye sahəsində 50 min, turizm və xidmət sahələrində isə 14 minədək insanın işlə təmin olunması imkanı yaranıb.
2002-2022-ci illər ərzində güzəştli kreditlərin regionlar üzrə bölgüsündə layihə sayı üzrə 6,5 faizi Bakı şəhəri və ətraf qəsəbələrin, 93,5 faizi isə regionların payına düşür. Maliyyələşdirilmiş layihə sayına görə regionlar arasında Qarabağ iqtisadi rayonu 17,6 faizlə ilk yerdədir. Məbləğ üzrə kreditlərin 25,6 faizi Bakı şəhəri, 74,4 faizi isə digər regionlarda fəaliyyət göstərən biznes subyektlərinə verilib.
Qeyd edək ki, Sahibkarlığın İnkişafı Fondu sahibkarlıq fəaliyyətinin maliyyələşdirilməsi və təşviq edilməsi istiqamətində fəaliyyət göstərən, 2018-ci ildə Sahibkarlığa Kömək Milli Fondunun hüquqi bazası əsasında yaradılmış publik hüquqi şəxsdir. Fond ölkədə sahibkarlığın inkişafına maliyyə dəstəyi verməklə qeyri-neft sektorunda innovativ texnologiyalara əsaslanan yeni istehsal, emal və infrastruktur müəssisələrinin yaradılmasına, ixracyönümlü və idxalı əvəz edən məhsul istehsalının artırılmasına, real sektora investisiya qoyuluşlarının sürətləndirilməsi ilə iqtisadiyyatda özəl sektorun payının daha da artırılmasına xidmət edir.
Bölmənin digər xəbərləri
