SAHİBKARLIQLA MƏŞĞUL OLMAQ İSTƏYƏN QADINLARA YARDIM EDİLİR

25.06.2004 [12:20]
Çap et
A⁺ A^-

ATƏT-in Bakı ofisinin maliyyə dəstəyi ilə Müstəqil Elmi-Praktik Hüquq Mərkəzinin (MEPHM) həyata keçirdiyi “Sahibkar və sahibkarlıqla məşğul olmaq istəyən qadınlara yardım” layihəsi davam etdirilir.

Mərkəzdən AZƏRTAC-a bildirmişlər ki, Oğuz rayonunda sahibkar və sahibkarlıqla məşğul olmaq istəyən qadınlar üçün sahibkarlığın əhəmiyyəti, problemləri, perspektivləri, sahibkarlıq fəaliyyətinin hüquqi-normativ əsasları, hüquqi və fiziki şəxslərin sahibkarlıq fəaliyyətinin əsas cəhətləri, mühasibat uçotunun aparılması, sənədləşmə, yoxlama, nəzarət və s. mövzularda təlim-kurslar keçirilmişdir. İştirakçılara sahibkarlıq fəaliyyəti ilə bağlı bilik və vərdişlər aşılayan metodik vəsaitlər, kitabçalar və gündəlik işdə istifadəsi zəruri olan materiallar paylanmışdır.

Məşğələdə sahibkarlıqla məşğul olan 22 qadın iştirak etmişdir. Təlimin sonunda iştirakçılara müvafiq sertifikatlar verilmişdir.