Sahil Babayev: Son 5 ildə 1 milyondan çox insana məşğulluq xidməti göstərilib
Bakı, 25 oktyabr, AZƏRTAC
İşğaldan azad olunmuş ərazilərə köçən əhalinin 70 faizinin məşğulluğu təmin edilib.
AZƏRTAC xəbər verir ki, bu sözləri əmək və əhalinin sosial müdafiəsi naziri Sahil Babayev “Qarabağ KOB-ları” layihəsinin təqdimat mərasimində deyib.
Nazir bildirib ki, köç edən vətəndaşların məşğulluğunun təmin edilməsi əsas hədəflərdəndir: "Qarabağa köçən əhalinin 70 faizinin məşğulluğu təmin edilib. Bu proses artaraq davam edəcək. Əhalinin əsas qisminə məşğulluq proqramları xitab etməlidir”.
Onun sözlərinə görə, Azərbaycan siyasətinin əsas xətlərindən biri “Böyük Qayıdış” proqramının həyata keçirilməsidir: “30 illik işğaldan sonra Azərbaycan Ordusu, xalqı Ali Baş Komandanın ətrafında birləşərək torpaqları azad etdi. Bizim qarşımızda duran ən böyük missiya həmin əraziləri Azərbaycanın ən gözəl, inkişaf edən, çiçəklənən bir guşəsinə çevirməkdir. Bu istiqamətdə “Böyük Qayıdış” proqramı uğurla icra edilir. Azad edilmiş ərazilərə əhali köçürülür. İlin sonuna qədər vətəndaşların azad edilmiş ərazilərə köçünün davam etdirilməsi planlaşdırılır”.
Nazir vurğulayıb ki, 124 min müharibə iştirakçısı, qazi və şəhid ailələrinə 380 mindən artıq xidmət göstərilib: “Onların sosial ödənişləri təmin olunub və mənzil təminatı proqramı icra edilib”.
S.Babayev əlavə edib ki, son 5 ildə 1 milyondan çox insana məşğulluq xidməti göstərilib.
Bölmənin digər xəbərləri
