Şahin Diniyev: Çempion olmaq istəyən komanda autsayderlərə xal verməməlidir
Bakı, 26 oktyabr, AZƏRTAC
Çempionatın ilk cizgiləri artıq görünür. Komandaların potensialını, oyun üslubunu, büdcəsini, maliyyə vəziyyətini və 8-9 turda göstərdikləri nəticələri nəzərə alsaq, görünən odur ki, çempionluq uğrunda üç komanda – “Sabah”, “Neftçi” və “Qarabağ” mübarizə aparacaq. Futbolda büdcə və maliyyə vəziyyəti də mühüm amillərdir. Digər tərəfdən, “Zirə” və “Turan Tovuz”un avrokuboklara vəsiqə uğrunda mübarizə aparmaq şansları daha çox görünür.
Bu sözləri AZƏRTAC-a açıqlamasında Azərbaycan millisinin sabiq baş məşqçisi Şahin Diniyev Premyer Liqada komandaların hazırkı vəziyyətini dəyərləndirərkən deyib.
Onun sözlərinə görə, digər kollektivlər daha çox orta sıralarda yer tutmaq və Premyer Liqada qalmaq uğrunda mübarizə aparacaqlar: “Çünki onların çıxışında sabitlik çatışmır. Bəzən autsayderlərə qarşı oyunlarda xal itirirlər. Belə şəraitdə çempionluq uğrunda mübarizə aparmaq çətindir. Bununla belə, mövsümün gedişində vəziyyət dəyişə bilər. Hazırkı 8-9 turun nəticələrinə əsasən, mənzərə belə görünür. Orta sıralarda qərarlaşan komandalardan hansısa avrokuboklar zonasına yüksəlməyə çalışa bilər. Ancaq indiki vəziyyətə görə çempionluq uğrunda əsas mübarizənin “Sabah”, “Qarabağ” və “Neftçi” arasında gedəcəyini düşünürəm”.
“Turan Tovuz”un çıxışına toxunan mütəxəssis komandanın qeyri-sabit oyununun səbəbini kənardan izah etməyin çətin olduğunu bildirib: “Komandanın daxilində baş verən proseslərdən xəbərim olmadığı üçün problemlər barədə danışmağı düzgün hesab etmirəm. Bu, etik baxımdan doğru olmaz. Ancaq bir komanda çempion olmaq istəyirsə, autsayderlərə qarşı oyunlarda xal itirməməlidir. “Turan Tovuz”un da belə qarşılaşmalarda itirdiyi xallar var. Məsələn, “İmişli” və “Kəpəz”ə məğlub olub. Səhv etmirəmsə, qarşıda ortabab komandalarla daha iki-üç oyunu var. Bu xalları çempionatın sonunda geri qaytarmaq çempionluğa iddialı komanda üçün çox çətin olacaq. Digər tərəfdən, “Turan Tovuz”un “Neftçi” ilə oyunda göstərdiyi çıxış “İmişli” ilə matçdakından fərqlənirdi. Burada aydın olmayan məqamlar var. Onları yalnız baş məşqçi və komandanın daxilində olan futbolçular bilə bilərlər. Kənardan fikir bildirmək düzgün olmaz”.
“Araz-Naxçıvan” və “Şəfa” komandalarının da nəticələrini şərh edən Şahin Diniyev hər iki klubun heyətində səviyyəli legionerlərin olmasına baxmayaraq, komandaların hələ sabit oyun nümayiş etdirə bilmədiklərini söyləyib: “Araz-Naxçıvan”ın heyətində kifayət qədər yaxşı futbolçular var və yeni baş məşqçinin gəlişi hələlik nəticələrə ciddi təsir göstərməyib. “Şəfa”nın heyətində də səviyyəli legionerlər çoxdur, lakin komanda öz oyununu tapa bilmir. Komandaların daxilində hansı problemlərin olduğunu bilmirəm. Ancaq görünən odur ki, hələlik sabit oyun nümayiş etdirə bilmirlər. Ardıcıl məğlubiyyətlər komandaların üzərində əlavə təzyiq yaradır. Hər oyuna bu yük altında çıxmaq çətindir. Bununla belə, Premyer Liqadan düşmək təhlükəsi yalnız “Araz-Naxçıvan” və “Şəfa” ilə bağlı deyil. “Qəbələ”, “İmişli”, “Kəpəz” və “Sumqayıt” da bu mübarizənin içindədir. Üçxallıq sistemdə bir-iki oyundan sonra turnir cədvəlində vəziyyət dəyişə bilər. Hazırda heç bir komanda Premyer Liqada qalacağına tam əmin ola bilməz. “Kəpəz”dən “Şamaxı”ya qədər aşağı sıralarda yer alan kollektivlərin hamısı təhlükə zonasından uzaqlaşmağa çalışmalıdır. Mən çempionatı şərti olaraq üç hissəyə bölürəm: çempionluq, avrokuboklara vəsiqə və Premyer Liqada qalmaq uğrunda mübarizə. Ancaq bu bölgü hələ tam formalaşmayıb. Mövsümün təxminən üçdə biri, bəlkə də bir qədər az hissəsi geridə qalıb. Daha 10-11 turdan sonra komandaların mövqeləri və hədəfləri barədə daha aydın fikir söyləmək mümkün olacaq. Hələlik yalnız ilkin mənzərəni görürük”.
O, legioner limiti ilə bağlı mövcud vəziyyətin Azərbaycan futboluna və milli komandaya təsirindən narahatlığını ifadə edib: “Bu gün Azərbaycan futbolunun əsas problemlərindən biri legionerlərlə bağlıdır. Bir çox komandada meydana 11 legioner çıxır, əvəzetmələr zamanı da legioner futbolçular oyuna daxil olurlar. Legioner limitinin aradan qaldırılması klubların imicinə və reytinqinə deyil, ilk növbədə milli komandaya təsir göstərir. Azərbaycan futbolu milli komandanın nəticələri ilə qiymətləndirilir. Həm liderlər, həm də autsayderlər 10-11 legionerlə oynayanda fərqli nəticələr gözləmək çətinləşir”.
Qeyd edək ki, Azərbaycan Premyer Liqasında turnir cədvəlinə 20 xalla “Sabah” başçılıq edir.
Müxbir – Cavid Əliyev
Bölmənin digər xəbərləri
