SİYASƏT
Salyanda Milli Qurtuluş Günü qeyd olunmuşdur
Salyan, 12 iyun (AZƏRTAC, Mahir Babayev). İyunun 12-də Salyan şəhərində Milli Qurtuluş Gününə həsr olunmuş tədbir keçirilmişdir.
AZƏRTAC xəbər verir ki, mərasim iştirakçıları əvvəlcə ümummilli lider Heydər Əliyevin abidəsi önünə gül dəstələri qoymuş, xatirəsini ehtiramla yad etmişlər.
Ulu Öndərin adını daşıyan Mərkəzdə dahi rəhbərin həyat və fəaliyyətini, Salyana səfərlərini əks etdirən foto və sənədlər maraqla qarşılanmışdır.
Mərasimdə Azərbaycanın ən yeni tarixinə qısa nəzər salınmışdır.
Bildirilmişdir ki, ötən əsrin 90-cı illərində dövlət müstəqilliyini bərpa edən Azərbaycan onu itirmək təhlükəsi ilə üzləşəndə Ulu Öndər milyonların təkidli çağırışı ilə yenidən siyasi hakimiyyətə qayıtmış və ölkəni xilas etmişdir.
Ümummilli Liderin 1993-cü il iyunun 15-də Azərbaycan Ali Sovetin sədri seçilməsi çağdaş tariximizə Milli Qurtuluş Günü kimi daxil olmuş və xalqımız Heydər Əliyev dühası ilə müstəqil və qüdrətli dövlət yaratmışdır.
Çıxışlarda Azərbaycan Respublikasının Prezidenti İlham Əliyevin rəhbərliyi altında ölkəmizin əldə etdiyi uğurlar xüsusi vurğulanmışdır.
Qeyd olunmuşdur ki, dünyada mötəbər söz sahibi olan Azərbaycan Cənubu Qafqazın aparıcı dövlətidir. Ölkənin sürətli inkişaf modeli regionları, o cümlədən Salyanı da əhatə etmişdir.
Rayonun özfəaliyyət kollektivlərinin konserti bayram ovqatını daha da artırmışdır.