SƏBAİL RAYONUNUN SAKİNLƏRİ ÖZ PREZİDENTİNƏ İNANIR, ONUN RƏHBƏRLİYİ ALTINDA AZƏRBAYCANIN GƏLƏCƏYİNƏ ÜMİDLƏ BAXIRLAR
AZƏRTAC xəbər verir ki, aprelin 18-də Səbail Rayonu İcra Hakimiyyətində cari ilin birinci rübünün yekunlarına və qarşıda duran vəzifələrə həsr olunmuş yığıncaq keçirilmişdir.
İdarə, müəssisə, təşkilat rəhbərlərinin, ictimai birliklərin, qeyri-hökumət təşkilatları nümayəndələrinin, iş adamları, ziyalılar və ağsaqqalların iştirak etdikləri yığıncaqda rayon icra hakimiyyətinin başçısı Sahib Ələkbərov ölkənin, o cümlədən regionların sürətli sosial-iqtisadi inkişafını nəzərdə tutan Dövlət proqramının rayonda yerinə yetirilməsi vəziyyəti, Azərbaycanın milli maraqlarına cavab verən tarazlaşdırılmış xarici siyasətin yeridilməsi, hüquqi dövlət quruculuğunun inkişaf etdirilməsi, əhalinin sosial müdafiəsi sahəsində görülmüş işlərdən danışmışdır.
Bildirilmişdir ki, bu ilin ilk üç ayında mövcud imkanlardan, əmək ehtiyatlarından, iqtisadi resurslardan kifayət qədər səmərəli istifadə edilməsi nəticəsində sənayedə məhsul istehsalının ümumi həcmi əvvəlki ilin müvafiq dövrü ilə müqayisədə 43 faiz artmışdır. İstehsal edilmiş sənaye məhsulunun 77,2 faizi qeyri-dövlət sektorunun payına düşür.
Rayonun nəqliyyat müəssisələri tərəfindən görülən işlərin və göstərilən xidmətlərin həcmi 88,2 milyon manat olmuşdur ki, bu da ötən ilin birinci rübünə nisbətən 85,7 faiz çoxdur. Ticarət və xidmət sahələrində əvvəlki dövrlə müqayisədə 129,1 faiz çox istehlak malları satılmış və pullu xidmətlər göstərilmişdir. Pərakəndə əmtəə dövriyyəsi 103,5 faiz və əhaliyə göstərilən pullu xidmətlər 153,7 faiz artmışdır.
Cari ilin yanvar-martında rayon üzrə orta aylıq əmək haqqı 2007-ci ilin müvafiq dövrünə nisbətən xeyli artaraq, sənayedə 583,4 manat, tikintidə 755,7 manat, rabitədə 812,6 manat olmuşdur. Hesabat dövründə rayonda 287 yeni iş yeri açılmışdır ki, onların da 280-i daimidir.
Natiq sahibkarlığın inkişafı, məşğulluq probleminin həlli, təhsil, səhiyyə və mədəniyyət, gənclərlə iş sahəsində həyata keçirilən tədbirlər, vətəndaşların qəbulu, ərizə və şikayətlərə baxılması, rayonda aparılan abadlıq və quruculuq işləri, əhalinin su, təbii qaz və elektrik enerjisi ilə təchizatının yaxşılaşdırılması, əlillərin, şəhid ailələrinin, qaçqın və məcburi köçkünlərin sosial müdafiəsi istiqamətində atılmış addımlardan da danışmışdır.
Məruzəçi xüsusi vurğulamışdır ki, xalqımız, o cümlədən Səbail rayonunun sakinləri öz Prezidentinə inanır, ölkəmizin başçısının gördüyü işləri, atdığı bütün addımları dəstəkləyir, onun rəhbərliyi altında Azərbaycanın gələcəyinə ümidlə baxırlar.
S.Ələkbərov problemləri, həlli vacib məsələləri xatırlatmış, dövlətimizin başçısını əmin etmişdir ki, rayonun sənaye müəssisələrinin, tikinti, xidmət təşkilatlarının və digər sahələrinin kollektivləri qazanılmış uğurların daha da artırılması və ölkəmizin iqtisadi qüdrətinin gündən-günə möhkəmləndirilməsi üçün bütün imkanları səfərbər edəcəklər.
Yığıncaqda çıxış edən digər natiqlər bildirmişlər ki, respublikamızın hər yerində olduğu kimi, Bakıda, o cümlədən onun mərkəzi inzibati ərazisi olan Səbail rayonunda son vaxtlar baş verən dəyişikliklər, xüsusilə tarixi, mədəni dəyərlərimizin daha dərindən öyrənilməsi və inkişafı üçün yaradılan şərait Prezident İlham Əliyevin adı, fəaliyyəti, diqqət və qayğısı ilə bağlıdır.
Yığıncaqda çıxış edən Prezidentin İcra Aparatı regional idarəetmə və yerli özünüidarəetmə orqanları ilə iş şöbəsinin məsul əməkdaşı Tağı Tağıyev Nazirlər Kabinetinin dövlətimizin başçısının sədrliyi ilə keçirilmiş iclasında müəyyən edilmiş vəzifələri bir daha xatırladaraq bildirmişdir ki, təməli ulu öndər Heydər Əliyev tərəfindən qoyulmuş, hazırda Prezident İlham Əliyevin rəhbərliyi altında uğurla reallaşdırılan iqtisadi inkişaf strategiyasına hər kəs öz töhfəsini verməlidir.
Yığıncaq iştirakçıları adından Azərbaycan Prezidenti İlham Əliyevə müraciət qəbul olunmuşdur.
Bölmənin digər xəbərləri
