SİYASƏT
Səfir: Cənubi Qafqaz regionunda çoxdan gözlənilən sülh və sabitlik bərqərar ola bilər
Kişineu, 13 aprel, AZƏRTAC
Azərbaycan Ermənistan tərəfinə beynəlxalq hüququn prinsiplərinə əsaslanan və mehriban qonşuluq münasibətlərinin əsasını təşkil edən sülh müqaviləsinin baza prinsiplərini təqdim edib.
AZƏRTAC xəbər verir ki, bunu Moldovanın “NOİ” xəbər portalına müsahibəsində Azərbaycanın bu ölkədəki fövqəladə və səlahiyyətli səfiri Qüdsi Osmanov söyləyib.
Səfir vurğulayıb ki, 44 günlük Vətən müharibəsindən sonra bölgədə vəziyyət dəyişib, Azərbaycan regionda sülh və sabitlik istəyir. “Ermənistan, ilk növbədə, Azərbaycanın ərazi bütövlüyünü, suverenliyini və sərhədlərinin toxunulmazlığını tanımalıdır. Bizə qarşı ərazi iddialarından da çəkinməlidir. Yalnız bu əsas prinsiplər əsasında Cənubi Qafqaz regionunda çoxdan gözlənilən sülh, sabitlik və firavanlıq bərqərar ola bilər”, - deyə Qüdsi Osmanov əlavə edib.
Müsahibədə səfir Azərbaycan və Moldova arasında əməkdaşlığın inkişafı, Ukraynadan təxliyə olunan azərbaycanlılara dövlət qayğısı və digər sualları da cavablandırıb.
Emil Hüseynli
AZƏRTAC-ın xüsusi müxbiri
Kişineu