Şəhid Elbrus Həsənovun xatirəsi yad edilmişdir
İsmayıllı, 4 fevral (AZƏRTAC). İsmayıllı rayonunun Qalıncaq kənd sakinləri Qarabağ uğrunda döyüşlərdə qəhrəmancasına şəhid olmuş həmyerliləri Elbrus Həsənovun xatirəsini izdihamlı mərasimlə yad etmişlər.
AZƏRTAC xəbər verir ki, şəhidin xatirəsinə həsr olunmuş mərasimdə kənd sakinləri, Elbrusun vaxtilə təhsil aldığı məktəbin müəllim və şagirdləri ilə yanaşı, rayon icra hakimiyyətinin, Qarabağ Müharibəsi Əlilləri və Şəhid Ailələri İctimai Birliyinin nümayəndələri iştirak etmişlər. Çıxışlarda Elbrus Həsənovun erməni təcavüzkarlarına qarşı döyüşlərdə göstərdiyi şücaətdən, 20 yaşında şəhidlik zirvəsinə ucalmasından bəhs olunmuşdur. Kənd ziyalıları, sinif yoldaşları şəhidin qısa və mənalı ömür yolundan danışmışlar.
Mərasimdə məktəblilərin ifasında təqdim edilən ədəbi-bədii kompozisiya, səsləndirilən şeirlər iştirakçılarda dərin təəssürat yaratmışdır.
Sonra şəhidin məzarı ziyarət olunmuş, ruhuna dualar oxunmuşdur. Valideynləri övladlarının xatirəsinə ehsan süfrəsi açmışlar. Kənddə zəhmətkeş bir ailə kimi tanınan Həsənovlar ailəsi övladlarının xatirəsini əziz tutduqları üçün qonaqlara və həmkəndlilərinə minnətdarlıq etmişlər.
Bölmənin digər xəbərləri
