Şəhidlərin xatirəsi xalqımız üçün əziz və müqəddəsdir
Neftçala, 20 yanvar, Mahir Babayev, AZƏRTAC
Ümumxalq hüzn günü Neftçala, Salyan, İmişli və Biləsuvarda böyük izdihamla qeyd olunub.
AZƏRTAC xəbər verir ki, Neftçalada rayonun icra strukturları, hüquq-mühafizə orqanlarının rəhbərləri, yüzlərlə sadə neftçalalı 20 Yanvar faciəsi qurbanlarının şərəfinə ucaldılmış abidəni ziyarət edib. Abidə önünə əklil və gül dəstələri qoyulub, azadlıq mübarizləri ehtiramla anılıb.
20 Yanvar hadisələri digər bölgələrimiz kimi, Neftçalada da təkrarlanıb. Bakıdakı qırğınlardan sonra sovet hərb maşını xalqın iradəsini qırmaq üçün bölgələrə üz tutdu. Bu baxımdan Neftçala da istisna təşkil etmədi. Rayonun mərkəzində şütüyən tanklardan atılan güllələr təkcə insanlara deyil, binalara da tuşlanmışdı. Həmin günlərdə Neftçala da azadlıq, müstəqillik uğrunda üç şəhid verdi. Əbülfəz Cəfərov, Nurəddin Ağahüseynov, Şəmsəddin Orucov şəhidlik zirvəsinə ucaldı, 10 neftçalalı yaralandı. Şəhid övladlarına ehtiramını bildirən neftçalalılar ümumxalq hüzn günündə onların məzarlarını da gül-çiçəyə qərq edib, azadlıq dastanımızın qəhrəmanlarını anıblar.
Anım mərasimi məktəblilərin 20 Yanvar faciəsinə həsr etdikləri rəsm əsərlərinin nümayişi və ədəbi-bədii kompozisiya ilə davam edib.
X X X
Salyanda şəhidlərin anım mərasimi 20 Yanvar xatirə kompleksinin önündən başlanıb.
AZƏRTAC xəbər verir ki, abidə önünə əklil və gül dəstələri qoyulduqdan sonra rayonun icra strukturlarının rəhbərləri, ictimaiyyət nümayəndələri və yüzlərlə salyanlı 20 Yanvarda şəhid olan və Salyan qəbiristanlığında uyuyan Elçin İmanovun məzarını da ziyarət edib. Sonra ərazi bütövlüyümüz uğrunda canından keçən salyanlı şəhidlərin uyuduğu Şəhidlər xiyabanına baş çəkilib.
Xalqımızın azadlıq və istiqlal mücadiləsində əsas mərhələlərdən olan 20 Yanvar faciəsi salyanlıların yaddaşında qürur tariximiz kimi dərin iz buraxıb. Zaman keçdikcə bu qəhrəmanlıq salnaməsi təkrar-təkrar xatırlanır, şəhidlərin əziz xatirəsi ehtiramla anılır.
X X X
İmişlidə 20 Yanvar faciəsinin 27-ci ildönümü ilə bağlı anım tədbiri keçirilib.
AZƏRTAC xəbər verir ki, rayon rəhbərliyi, ictimaiyyət nümayəndələri, təhsil, səhiyyə, mədəniyyət işçiləri, hüquq-mühafizə orqanlarının əməkdaşları, hərbçilər Şəhidlər xiyabanına gələrək ölkəmizin azadlığı və ərazi bütövlüyü uğrunda şəhid olan Vətən oğullarının məzarlarını ziyarət edib, abidə önünə tər qərənfillər düzüblər. 1941-45-ci il abidə kompleksi də ziyarət edilib.
Mərasimdə çıxış edən İmişli Rayon İcra Hakimiyyətinin başçısı Vilyam Hacıyev 27 il əvvəl sovet hərbi birləşmələrinin Bakıda törətdiyi qırğınlardan, günahsız insanlara qarşı edilən vəhşiliklərdən danışıb. Bildirilib ki, xalqımızın şüurunda milli ruhun dirçəliş rəmzinə çevrilən 20 Yanvar faciəsi ölkəmizin tarixinə həm də qəhrəmanlıq salnaməsi kimi daxil olub. Şəhidlərin xatirəsi xalqımız üçün əziz və müqəddəsdir.
X X X
20 Yanvar faciəsinin 27-ci ildönümü Biləsuvarda da böyük izdihamla qeyd olunub.
AZƏRTAC xəbər verir ki, rayonun icra strukturlarının rəhbərləri, minlərlə biləsuvarlı Vətən uğrunda canından keçən qəhrəman övladların xatirəsinə ucaldılan 20 Yanvar abidəsi və Şəhidlər xiyabanını ziyarət edib. İstiqlal tariximizin qəhrəmanlarının abidəsi önünə gül dəstələri qoyularaq, xatirələri ehtiramla yad olunub.
Sonra mərasim iştirakçıları rayonun Çaylı kənd məzarlığında uyuyan 20 Yanvar şəhidləri Əlimərdan Hüseynov və Baba Xammədovun məzarlarını ziyarət ediblər.
Anım mərasimində ədəbi-bədii kompozisiya nümayiş olunub.
Bölmənin digər xəbərləri
