“SƏHRANIN BƏYAZ GÜNƏŞİ” FİLMİNİN DAVAMI ÇƏKİLİR
AZƏRTAC xəbər verir ki, “Səhranın bəyaz günəşi” filminin davamı 2009-cu ildə ekranlara çıxacaqdır.
Bu təşəbbüs original filmin ssenariçisi Rüstəm İbrahimbəyova məxsusdur. Onun dediyinə görə, yeni filmdə məşhur qəhrəmanların uşaqlıq və gənclik illərindən danışılacaqdır.
Filmin ssenari müəllifi və prodüsseri R.İbrahimbəyov olacaqdır. Rejissorun adı isə hələlik açıqlanmır. İbrahimbəyovun sözlərinə görə, çəkilişlər qışda başlanacaq, film isə 2009-cu ilin sonuna tamamlanacaqdır.
“Səhranın bəyaz günəşi” filmi 1969-cu ildə ekrana çıxmışdır. Bəzi məlumatlara görə, kinoteatrlarda ona 100 milyonadək tamaşaçı baxmışdır.
Rüstəm İbrahimbəyov deyir ki, Rusiya-Azərbaycan-Fransa birgə layihəsinə qızğın hazırlıq gedir. Bu psixoloji dramda orta yaşlı kişidən və gənc qadından söhbət açılacaqdır. Dəqiq bilirəm ki, filmin ssenari müəllifi və prodüsseri özüm, ola bilsin ki, yaxşısı tapılmasa, rejissoru da mən olacağam.
Bölmənin digər xəbərləri
