Serbiya və Kosovo liderləri Brüsseldə normallaşma prosesini müzakirə edəcək
Belqrad, 25 oktyabr, AZƏRTAC
Serbiya Prezidenti Aleksandar Vuçiç və Kosovonun Baş naziri Albin Kurti Avropa İttifaqına üzv ölkələrin sammitində iştirak etmək üçün Brüsselə gedəcək.
AZƏRTAC xəbər verir ki, Serbiya ilə Kosovo liderləri oktyabrın 26-27-də baş tutacaq sammit çərçivəsində müxtəlif görüşlər keçirəcəklər. Görüşlərdə Aİ-nin Belqrad-Priştina dialoqu çərçivəsində Serbiya və Kosovo arasında normallaşma prosesini inkişaf etdirmək yolları müzakirə olunacaq.
Aleksandar Vuçiç və Albin Kurtinin sammitdə ikitərəfli görüşü gözlənilmir.
Xatırladaq ki, Serbiya və Kosovo liderləri sonuncu dəfə sentyabrın 14-də Brüsseldə görüşmüşdü. Aİ-nin xarici və təhlükəsizlik məsələləri üzrə ali nümayəndəsi Cozef Borelin iştirakı ilə keçirilən görüş uğursuz nəticələnmişdi.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
