Bakı, 18 oktyabr (AZƏRTAC). Ermənistan prezidenti Serj Sarkisyan şənbə günü Gorusda diaspordan olan jurnalistlər qarşısında çıxışında özünün sərsəm tezisləri ilə bütün dünyanın elmi ictimaiyyətini növbəti dəfə heyrətləndirmişdir. Ölkə rəhbəri bu dəfə KİV nümayəndələrinə hansısa “araşdırma”nın nəticələri barədə məlumat verməyi qərara almışdır.

Ermənistan prezidenti lovğalanaraq demişdir: “Tərkibində bircə nəfər də erməni olmayan genetik və dilçi alimlərin böyük bir qrupu mürəkkəb və uzunmüddətli araşdırma aparmışdır. Son məlumatlara görə, erməni dilinin ən azı 8 min illik tarixi vardır. Bu o deməkdir ki, biz bir millət kimi ən azı 8 min ildir mövcuduq”.

Məlum olduğu kimi, indiyə qədər ermənilər bütün dünyaya car çəkirdilər ki, bu millət “4500 illik tarixə malikdir”. Hərçənd, bu fikrin də heç bir elmi əsası yox idi və o, sırf siyasi məqsədlərə xidmət edirdi. Bu dəfə isə Serj Azatoviç “xırdaçılıq” etməməyi və ermənilərin tarixini birdən-birə az qala iki dəfə “qədimləşdirməyi” qərara almışdır. Əgər bu əyləncəli riyaziyyat bu surətlə davam edərsə, yaxın vaxtlarda ermənilər pterodaktillərdən və dinozavrlardan da qədim olacaq, Darvinin təkamül nəzəriyyəsi altı üstünə çevriləcəkdir. Onda bütün ermənilərin prezidentinin təkəbbürlə istinad etdiyi və tərkibində heç bir erməni olmadığı fəxrlə bəyan edilən, lakin nədənsə adı məlum olmayan “genetik və dilçilər qrupu” fal açmalı olacaq: görəsən, kim kimdən əmələ gəlib: homo sapiens meymundan, yoxsa meymun ermənidən?

Əlbəttə, əvvəllər elektrotexnika zavodunda çilingər işləmiş prezidentin ciddi elmi təhsilinin olmaması onun antropologiyadan və dilçiliyin əsaslarından tamam bixəbər olmasına, eləcə də komandasında ağıldankəm spiçrayterlərin mövcudluğuna əsla haqq qazandırmır. Əgər Sarkisyan bu cəfəngiyatı elm korifeylərinin iştirak etdiyi ciddi akademik forumda dilə gətirsəydi, onu dərhal lağa qoyardılar! Dünyada heç bir dil, xüsusən bu dilin daşıyıcısı olan xalqın Amazonka cəngəlliklərində, yaxud başqa bir planetdə, təcrid olunmuş şəkildə, başqa dillərin daşıyıcıları ilə əlaqə saxlamadan deyil, çoxsaylı etnosların arasında və tarixi hadisələrlə, miqrasiya prosesləri ilə çox zəngin olan Ön Asiya kimi bir regionda yaşadığı halda, 8 min il ərzində dəyişməz şəkildə mövcud ola bilməz! Prezidentləri üçün belə bir sərsəm nitqi yazanlar, görünür, heç fikirləşməyiblər ki, əgər erməni alimləri cəmi minillik tarixə malik olan orta əsr əlyazmalarını çətinliklə oxuyur və başa düşürsə, (dil isə daim inkişaf etmək və dəyişmək xassəsinə malikdir), onda erməni dilinin səkkiz min illik tarixi haradan yarana bilər? Bəlkə də spiçrayterlər “erməni dili” və “insanın aydın başa düşülə bilən tərzdə danışmaq qabiliyyəti” anlayışlarını eyniləşdirməyi qərara alıblar?

Elə həmin çıxışında Ermənistan prezidenti vaxtilə öz torpaqlarını onun əcdadlarına vermiş və köçkün hayları bu ərazidə qəbul etmiş qonşu xalqın tarixini “qısaltmağa” cəhd göstərmişdir. Onun sözlərinə görə, “Azərbaycan sözü cəmi bir əsr bundan əvvəl yaranmışdır”. Deməli, keçmiş çilingərin xəbəri yoxdur ki, “Azərbaycan” sözü qədim “Atropatena” sözünün ərəbləşdirilmiş formasıdır, “Atropatena” sözü isə cəmi bir əsr bundan əvvəl heç cür yarana bilməzdi. Bunu, elə həmin gün “Azərbaycan dövləti və “Azərbaycan” adı dünya xəritəsində ilk dəfə 1918-ci ildə yaranmışdır” deyən keçmiş bioloq Şavarş Koçaryan da bilmir.

Ermənistan XİN başçısının müavini bilməli idi ki, 1918-ci ildə dünya xəritəsində “Azərbaycan” adı deyil, Azərbaycan Respublikası yaranmışdır. Azərbaycan adının isə eynilə Atropatena adı qədər yaşı vardır. Yeri gəlmişkən, 1918-ci ilə qədər heç bir manuskriptdə “Ermənistan Respublikası” termininin də adı çəkilməmişdir. İstəyirsinizsə, salnamələrə nəzər salın və onlarda “Ermənistan Respublikası” sözünü tapmağa çalışın. Belə respublika olmamışdır! İndi nə olsun, deyək ki, Ermənistan da yoxdur? Buradan belə çıxırmı ki, o vaxta qədər erməni xalqı da olmamışdır?

“Sovet İttifaqı” termininin də dil dövriyyəsinə daxil olmasından bir əsrdən az vaxt keçmişdir. Bu, yeni dövlət idi və onun adı da yeni idi. Lakin ermənilərin başabəla rəhbərlərinin məntiqinə görə bu o deməkdirmi ki, 1922-ci ilə qədər Sovet İttifaqının bütün ərazisində heç kəs yaşamamışdır, planetin ərazisinin 1/6 hissəsi məskunlaşmamış, sonradan küll halında sovet xalqı adlanan bütün insanlar isə bu yerə göydən düşmüşlər? Biz hamımız SSRİ tarixi kursunu öyrənmişik. Bu tarix 1922-ci ildən deyil, ən qədim dövrlərdən başlanırdı. Sovet dövründə Araz çayının hər iki sahilində yaşayan Azərbaycan türklərinə “azərbaycanlılar” kimi yeni və müxtəsər ad verilməsi faktına görə bu xalqın öz çoxəsrlik tarixi ilə, öz keçmişi ilə əlaqələri əsla qırılmır və bu xalq “göydən düşmüş” elan edilmir. Sovet dövründə bu xalqın özü deyil, xalqın yeni adı yaranmışdır.

Bu tezisin gülməli cəhəti ondan ibarətdir ki, əgər Sarkisyanın və Koçaryanın məntiqinə əsaslansaq, onda bu gün nə Ermənistandan əsər-əlamət var, nə də ermənilərdən, çünki onlar öz respublikalarını Hayastan, özlərini isə hay adlandırırlar. Əslində bu düzgündür, çünki bugünkü Ermənistan Respublikası ilə xalis coğrafi termin olan və bütünlüklə Türkiyə ərazisində yerləşmiş Ermənistan arasında, eləcə də friqiya hayları ilə “ermənilər” arasında heç bir əlaqə, heç bir ümumi cəhət yoxdur. “Ermənilər” isə ayrıca etnik qrup deyil, çox güman ki, coğrafi ərazi mənasında Ermənistan yaylasının sakinləridir (məsələn, sibirlilər deyəndə coğrafi mənada Sibirin sakinləri, afrikalılar deyəndə coğrafi mənada Afrikanın sakinləri, dağıstanlılar dedikdə coğrafi mənada Dağıstanın sakinləri başa düşüldüyü kimi). Buna görə də, Serj Azatoviç zəhmət çəksin, diaspordan olan jurnalistlərinə izah etsin görək, onun xalqının nümayəndələri öz dövlətlərini öz aralarında utana-utana “Hayastan”, özlərini isə “hay” adlandırdığı halda onun coğrafi mənada Ermənistanla heç bir əlaqəsi olmayan dövləti “Ermənistan” adını nə üçün özbaşına mənimsəmişdir.

Xankəndi ərazisində guya az qala V əsrdən mövcud olmuş “Vararakn” adlı “erməni məskəni” də eyni qayda ilə tələm-tələsik “icad edilmişdir”! Ağdamın yerində bir “Tiqranakert”imiz var. Sarkisyan özü də etiraf etmişdir ki, bura ermənilərin vətəni deyildir. Belə çıxır ki, ya Ermənistan prezidenti başabəla erməni arxeoloqlarının qazıntı işləri nəticəsində aşkar etdikləri mifik “Tiqranakert”in də, onun tələm-tələsik uydurulmuş adının da cəfəngiyat olmasını etiraf etməklə onları biabır etmiş, ya da özü xaincəsinə öz vətəninin bir hissəsindən üz döndərən yarımçıq erməniyə çevrilmişdir. Hərçənd, məsələ bunda deyil - əgər erməni saxtakarlarına müvafiq tapşırıq verilsə, onlar günü sabah Vaşinqtonun yerində “Serjakert” deyilən “qədim erməni məskəni”, Kamçatkada isə xaçkarlar və erməni dilində “çağlayan” bulaqlar “aşkar edəcəklər”. Biz erməni elminin saxtakarlıqlarına və erməni dövlət təbliğatının sərsəmləməsinə artıq çoxdan adət etmişik.