“Şərq filologiyası məsələləri” məqalələr toplusunun yeddinci buraxılışı nəşr olunmuşdur
Bakı, 1 noyabr (AZƏRTAC). AMEA akademik Ziya Bünyadov adına Şərqşünaslıq İnstitutunda hazırlanan “Şərq filologiyası məsələləri” məqalələr toplusunun yeddinci buraxılışı nəşr olunmuşdur.
İnstitutdan AZƏRTAC-a bildirmişlər ki, toplunun “Ərəb filologiyası” bölməsində Lalə Bayramovanın “Sirələrin coğrafi arealı və tarixi fonu”, Kamil Şərifovun “Nizar Qabbanidə şeir və şairlik məfhumu”, Tural Sadıqlının “Ərəb ədəbiyyatında roman janrının yaranması və XX əsrin birinci yarısındakı Misirdə roman yazarları”, Xuraman Əliyevanın “Professor A.İmanquliyevanın ərəb məhcər ədəbiyyatına dair elmi araşdırmaları”, “Fars filologiyası” bölməsində Şəfəq Əlibəylinin “Nizami “Xəmsə”sində səs semantikalı feillərin üslubi özəllikləri”, Əsmətxanım Məmmədovanın “Fars dilində “S” əsaslı omofonlar”, Nüşabə Əlizadənin “Səməd Behrənginin nağıl dünyası”, Moctəba Şoainin “Şəhriyarın farsca divanında frazeoloji birləşmələr”, “Türk filologiyası” bölməsində Xalidə Qafqazlının “Ən qədim xalq bayramı - Novruz”, Əsgər Rəsulovun “İskəndər Palanın tarixi romanları”, Sənan İbrahimovun “Cavid romantizmində sufizm” kimi 30-a yaxın məqalə təqdim edilir.
Bölmənin digər xəbərləri
