Seul KXDR qoşunlarının Rusiyaya göndərilməsini pisləyib
Bakı, 28 aprel, AZƏRTAC
Şimali Koreya qoşunlarının Rusiyaya göndərilməsi beynəlxalq normalara ziddir.
AZƏRTAC xəbər verir ki, Yonhap agentliyinin məlumatına görə, bu barədə bəyanat Koreya Respublikasının Xarici İşlər Nazirliyi tərəfindən səsləndirilib.
“KXDR Rusiyaya qoşun göndərdiyini etiraf edib və bunun beynəlxalq hüquq normalarına tam uyğun olduğunu deyib. Biz Pxenyanın bu hərəkətlərini qətiyyətlə pisləyirik”, - deyə XİN-in məlumatında bildirilib.
Seul, həmçinin Rusiya və Şimali Koreyanı “qeyri-qanuni hərbi əməkdaşlığı dərhal dayandırmağa” çağırıb.
Qeyd edək ki, bir müddət öncə, KXDR lideri Kim Çen In Rusiyanın Kursk vilayətində hərbi əməliyyatlarda iştirak edən KXDR əsgərlərini qəhrəman adlandırıb. Pxenyan Şimali Koreya əsgərlərinin qonşu ölkəndə döyüşlərə cəlb edilməsi qərarının Kim Çen In tərəfindən verildiyini və bunun iki ölkə arasında Hərtərəfli Strateji Tərəfdaşlıq haqqında Müqavilənin 4-cü maddəsinə uyğun gəldiyini iddia edib.
Aprelin 28-də koreyalı hərbçilərin Kursk vilayətindəki döyüşlərdə iştirakını qiymətləndirən Rusiya Prezidenti Vladimir Putin onlara təşəkkür edib və Kim Çen Ina minnətdarlığını bildirib.
Bölmənin digər xəbərləri
