Sevinc Fətəliyeva: Erməni faşizmini ifşa etmək üçün beynəlxalq müstəvidə fəaliyyətimizi daha da gücləndirməliyik
Bakı, 8 yanvar, AZƏRTAC
Artıq tarixə qovuşmuş 2020-ci il Azərbaycan üçün böyük uğurlarla yadda qaldı. Ölkəmiz ötən ilin sentyabr ayının 27-dən noyabr ayının 10-dək özünün ərazi bütövlüyünün bərpa edilməsi uğrunda Vətən müharibəsi apardı. 44 gün davam edən müharibədə Prezident, Müzəffər Ali Baş Komandan İlham Əliyevin rəhbərliyi ilə Azərbaycan Silahlı Qüvvələri düşmənə sarsıdıcı zərbələr endirdi və işğalçı Ermənistanı məğlubiyyətə uğratdı. Öz məğlubiyyətini etiraf edən Ermənistan noyabrın 10-da onun üçün kapitulyasiya aktı sayılan üçtərəfli Bəyanata imza atmaq məcburiyyətində qaldı və bu sənədə əsasən üzərinə götürdüyü öhdəliklərə uyğun olaraq dekabrın 1-dək Ağdam, Kəlbəcər və Laçın rayonlarını döyüşsüz respublikamıza təhvil verdi. Bununla da, 30 il ərzində həllini tapmayan Dağlıq Qarabağ münaqişəsinə son qoyuldu və ölkəmizin ərazi bütövlüyü tam təmin olundu.
AZƏRTAC xəbər verir ki, bunu Milli Məclisin Beynəlxalq münasibətlər və parlamentlərarası əlaqələr komitəsinin sədr müavini, YAP-ın Beynəlxalq əlaqələr şöbəsinin müdiri Sevinc Fətəliyeva deyib.
S.Fətəliyeva bildirib ki, Vətən müharibəsində qazanılan şanlı qələbənin ölkəmiz və xalqımız üçün əhəmiyyəti çox böyükdür. Prezident İlham Əliyevin yanvarın 6-da 2020-ci ilin yekunlarına həsr olunmuş videoformatda keçirilən müşavirədə qeyd etdiyi kimi, bu Qələbə tarixdə əbədi qalacaq. Hazırda qarşıda duran vəzifə Vətən müharibəsində qazanılan şanlı qələbəni siyasi yolla möhkəmləndirmək, regionda erməni faşizminin baş qaldırmasına imkan verməmək, keçmiş münaqişə ilə və indiki reallıqla bağlı, o cümlədən dağıdılmış ərazilər haqqında beynəlxalq ictimaiyyətə məlumat çatdırmaqdan ibarətdir. Müharibədə sarsıdıcı məğlubiyyətə uğrayan Ermənistanın revanşist cəhdlərinin və təxribat əməllərinin qarşısının alınması da vacib məsələlər sırasında dayanır.
Deputatın sözlərinə görə, dövlətimizin prinsipial mövqeyi noyabrın 10-da Azərbaycan, Rusiya prezidentləri və Ermənistan baş naziri tərəfindən imzalanmış üçtərəfli Bəyanata əsaslanır. Bu sənəddə təsbit olunmamış heç bir fəaliyyət həyata keçirilə bilməz, yaxud Azərbaycanın buna prinsipial icazəsi olmalıdır. Azərbaycan hazırda ərazidəki vəziyyəti düzgün dəyərləndirir və humanitar məsələlərin həllinə razılığını verib. Lakin bundan sui-istifadə yolverilməzdir. Təəssüf doğuran haldır ki, müharibədə sarsıdıcı məğlubiyyətə uğrayan Ermənistanda müəyyən revanşist cəhdlər müşahidə edilməkdədir.
“Eyni zamanda, müharibə bitdikdən sonra Azərbaycanın icazəsi olmadan xarici ölkə vətəndaşlarının, rəsmi şəxslərinin, o cümlədən Fransa parlamentarilərinin, Ermənistan XİN rəhbərinin Dağlıq Qarabağa səfərləri narahatlıq doğurmaya bilməz. Belə təhrikedici hərəkətlər yolverilməzdir. Əgər bu cür təxribatçı addımlar gələcəkdə də davam edəcəksə, Azərbaycan sərt cavab vermək məcburiyyətində qalacaq. Azərbaycan Prezidenti qarşı tərəfə bu barədə sərt xəbərdarlıq da edərək bildirdi ki, nəticə çıxarmasalar, onların böyük problemləri olacaq və yenə də peşman olacaqlar”,- deyən deputat əlavə edib. O qeyd edib ki, hazırda işğaldan azad olunmuş ərazilərimizdə quruculuq işlərinə başlanıb və Qarabağ regionunun gözəl gələcəyi var. Azərbaycan dövləti bu əraziləri dünyanın ən gözəl məkanlarından birinə çevirəcək.
“Vətən müharibəsi dövründə biz xalq olaraq çox güclü həmrəylik nümayiş etdirdik. Siyasi baxışlarından, mövqeyindən və əqidəsindən asılı olmayaraq, hər kəs bir amal uğrunda birləşdi. Təbii ki, biz buna Prezidentimizin həyata keçirdiyi islahatlar nəticəsində nail olduq. Genişmiqyaslı islahatların tərkib hissəsi kimi demokratik, siyasi islahatlar ölkəmizdə həmrəyliyimizin və birliyimizin güclənməsində mühüm rol oynadı. Bundan sonrakı mərhələdə isə Azərbaycan Prezident İlham Əliyevin tövsiyəsinə uyğun olaraq, qələbəmizi siyasi yollarla möhkəmləndirmək, erməni faşizmini və vandalizmini ifşa etmək üçün beynəlxalq müstəvidə fəaliyyətimizi gücləndirməliyik. Bu prosesdə həm siyasi partiyalarımız, həm də parlamentarlar olaraq bizlər fəaliyyətimizi daha da artırmalıyıq”, - deyə S.Fətəliyeva vurğulayıb.
Bölmənin digər xəbərləri
