Sığınacaq və Sosial Reabilitasiya Müəssisəsinə bu il 150 nəfər qəbul olunub
Bakı, 21 avqust, AZƏRTAC
Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin Həssas əhali qruplarından olan şəxslər üçün Sığınacaq və Sosial Reabilitasiya Müəssisəsinə bu il 150 nəfər qəbul olunub. Onlardan 11-nəfəri 18 yaşadək uşaq, 139-nəfəri 18 yaşdan yuxarı olanlardır. Həmin şəxslər yaş qruplarına uyğun olaraq müəssisənin müvafiq bölmələrinə qəbul ediliblər.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, mart ayından pandemiya ilə əlaqədar müəssisəyə birbaşa qəbul aparılmadığından qəbul edilən şəxslər əvvəlcə müəssisənin ərazisindəki karantin bölməsinə yerləşdirilirlər. Müasir tələblərə uyğun şəraitin yaradıldığı bölmədə 14 gün ərzində xüsusi geyimlə, qoruyucu vasitələrlə, qida və s. ilə təmin edilirlər və mütəmadi müayinələri aparılır. Həmin müddətdə onlarda koronavirusa yoluxma aşkar edilmədikdə, Sığınacaq və Sosial Reabilitasiya Müəssisəsinə qəbul olunurlar.
Hazırda həssas əhali qruplarından olan şəxslər üçün Sığınacaq və Sosial Reabilitasiya Müəssisəsində 56 nəfər yaşayır. Onların normal həyat tərzinə sahib olması, cəmiyyətin digər üzvləri ilə yanaşı addımlaya bilməsi, əmək qabiliyyətli olanların əmək bazarına dönüşü və s. üçün də işlər aparılır.
Bölmənin digər xəbərləri
