İQTİSADİYYAT
Sığortaçılar Assosiasiyası daşınmaz əmlak sığortası üzrə müqavilələrin sayını açıqlayıb
Bakı, 14 yanvar, AZƏRTAC
Azərbaycan Sığortaçılar Assosiasiyası (ASA) “Daşınmaz əmlakın icbari sığortası” növü üzrə yerli sığorta şirkətləri tərəfindən bağlanan müqavilələrin sayını açıqlayıb.
ASA-dan AZƏRTAC-a bildirilib ki, “Daşınmaz əmlakın icbari sığortası” növü üzrə 2020-ci ilin 10 ayı ərzində bazarda xüsusi aktivliyi ilə seçilən təkcə 5 şirkət tərəfindən vətəndaş və sahibkarlarla 149 min 478 müqavilə bağlanıb. Bununla da 2019-cu ilin analoji dövri ilə müqayisədə qeyd olunan növ üzrə müqavilə sayında 3 dəfəyədək artım qeydə alınıb. Ötən ilin 10 ayı ərzində 5 şirkət tərəfindən 53 min müqavilə bağlanıb. Müvafiq artımda fiziki şəxslərin ümumi payı çoxluq təşkil edir.
Daha bir statistikaya görə, 2020-ci ilin ən son açıqlanan 11 aylıq icmal göstəricilərinə əsasən, “Daşınmaz əmlakın icbari sığortası” növü üzrə yerli sığorta şirkətləri 38,6 milyon manat yığım təmin edib. Bu da 2019-cu ilin eyni dövrü ilə müqayisədə 6,5 milyon manat çoxdur. Eyni zamanda, keçən ilin yanvar-noyabr aylarında vətəndaş və sahibkarlara “Daşınmaz əmlakın icbari sığortası” növü üzrə baş vermiş hadisələrə görə 3,7 milyon manat ödəniş olunub.