Şimal-qərb bölgəsində keçirilən zona yarışlarında 1300-dən çox məktəbli mübarizə aparıb
Şəki, 16 dekabr, Mustafa Dadaşov, AZƏRTAC
Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin və müvafiq idman federasiyalarının dəstəyi ilə məktəblilər arasında keçirilən respublika çempionatının Şəki-Zaqatala Regional Təhsil İdarəsinin əhatə etdiyi rayonlar üzrə zona mərhələsi yekunlaşıb. Zona mərhələsində bölgənin ümumi təhsil müəssisələrinin şəhər və rayon turlarında qalib gəlmiş komandalar iştirak edib. Atletika, basketbol və badminton idman növləri üzrə təşkil edilən zona yarışlarında ümumilikdə 231 komandanın tərkibində 1379 məktəbli mübarizə aparıb.
Bu barədə AZƏRTAC-ın bölgə müxbirinə Şəki-Zaqatala Regional Təhsil İdarəsinin məsul əməkdaşı Mahal Məmmədov məlumat verib.
Bildirilib ki, yarışların keçirilməsində əsas məqsəd məktəblilər arasında sağlam həyat tərzinin təbliği, idmana marağın artırılması və istedadlı şagirdlərin üzə çıxarılması olub.
Atletika idman növü üzrə yarışlarda ümumilikdə 111 komanda olmaqla, 667 nəfər şagird iştirak edib. Yarışların nəticələrinə əsasən, Zaqatala rayonu Danaçı kənd 1 nömrəli tam orta ümumtəhsil məktəbinin komandası qalib gəlib.
Basketbol idman növü üzrə oğlan və qız komandaları arasında keçirilən yarışlarda 78 komandanın tərkibində ümumilikdə 544 şagird mübarizə aparıb. Oğlanlar arasında Zaqatala şəhər Vətən Müharibəsi Qəhrəmanı Ş.Qaflanov adına Humanitar fənlər təmayüllü gimnaziyanın, qızlar arasında isə Qax şəhər N.Allahverdiyev adına 2 nömrəli məktəb-liseyin komandaları birinci yerə layiq görülüblər.
Badminton idman növü üzrə 42 komandanın tərkibində 168 şagirdin iştirak etdiyi zona yarışlarında isə Şəki şəhər Fizika-riyaziyyat və humanitar təmayüllü liseyin komandası qalib adını qazanıb.
Qeyd edək ki, zona mərhələsində qalib gələn komandalar respublika çempionatının final mərhələsində iştirak hüququ əldə ediblər.
Bölmənin digər xəbərləri
