Şimali Makedoniyada hava çirkliliyi ciddi şəkildə artır
Skopye, 28 oktyabr, AZƏRTAC
Şimali Makedoniyada son dövrlərdə havanın çirklənməsinin ciddi şəkildə artdığı bildirilir.
AZƏRTAC xəbər verir ki, ətraf mühit fəalları tərəfindən nəşr olunan məlumatlarda hava çirklənməsinin əsasən çirkli yanacaq yandıran qurumlardan qaynaqlandığı bildirilir. Ekoloqlar böyük şəhərlərdə havanın çirklənməsinin səbəblərinin hərtərəfli və ətraflı təhlilinin aparılmamasından şikayət edirlər.
Ölkədə məktəblər, uşaq bağçaları, xəstəxanalar, məhkəmələr və hərbi kazarmalar da daxil olmaqla 700-dək obyektdə istilik üçün aşağı keyfiyyətli ağır mazutdan, xam neft və kömürdən istifadə olunur. Bu qurumlardan 100-ə yaxını paytaxt Skopyedə yerləşir.
Şimali Makedoniyada “yaşıl enerji” transformasiyası ilə bağlı strategiya 2021-ci ildə gündəmə gəlib. Həmin vaxt növbəti 10 il ərzində kömürdən imtina etməyi hədəfləyən plan açıqlanıb, lakin bu, həyata keçirilməyib.
Statistik məlumatlar göstərir ki, ölkədə elektrik enerjisinin 50 faizi əsasən kömür yandırılan stansiyalardan, 33 faizi hidroenerji mənbələrindən, yalnız 4 faizi külək və günəş enerjisi də daxil olmaqla digər mənbələrdən əldə edilir.
Xatırladaq ki, ötən qış mövsümündə Skopye və bəzi digər şəhərlər qatı dumana bürünmüşdü.
Nihad Budaqov
AZƏRTAC-ın xüsusi müxbiri
Skopye
Bölmənin digər xəbərləri
