Bakı, 18 sentyabr, T.İvanayeva, AZƏRTAC

Hər il sentyabrın 18-də Azərbaycanda müasir peşəkar musiqi sənətinin banisi Üzeyir Hacıbəylinin doğum günündə keçirilən bayram - Milli Musiqi Günü qeyd olunur. Həmin gün ölkədə Üzeyir Hacıbəyli Beynəlxalq Festivalı açılır. Bu əlamətdar hadisələr münasibətilə AZƏRTAC ölkəmizin mədəniyyət və incəsənət xadimləri, musiqiçiləri, musiqi sahəsinin nümayəndələri ilə söhbət edib.

Siyavuş Kərimi - Azərbaycan Respublikasının Xalq artisti, professor, Azərbaycan Milli Konservatoriyasının rektoru:

“Bu gün, 18 sentyabr Milli Musiqi Günündə, ənənəyə uyğun olaraq, Azərbaycan torpağının dahi oğlu Üzeyir Hacıbəylinin adını daşıyan festival başlayır.

Təbii ki, bu, çox böyük əhəmiyyət kəsb edən, ölkəmizin mədəni həyatında mühüm rol oynayan bir hadisədir. Bu, Azərbaycan milli musiqisinin təbliği baxımından son dərəcə vacibdir. Bu günlərdə ən müxtəlif konsertlər keçiriləcək. Paytaxtın aparıcı konsert məkanlarında təkcə tanınmış musiqiçilər deyil, həm də festival gənclərə öz istedadlarını nümayiş etdirmək imkanı verir. Festivalın proqramında Üzeyir bəyin bu günə qədər demək olar ki, səsləndirilməyən və ya nadir hallarda ifa olunan əsərləri də yer alacaq.

Məmnuniyyətlə qeyd etmək istəyirəm ki, Azərbaycanda belə genişmiqyaslı festivallar çoxdur. Məsələn, Qara Qarayev adına Beynəlxalq Müasir Musiqi Festivalı, Beynəlxalq Mstislav Rostropoviç Festivalı, Qəbələ Musiqi Festivalı, Beynəlxalq Muğam Festivalını qeyd etmək olar.

Amma Üzeyir bəyin doğum günü ilə bağlı hazırkı festivalın xüsusi mənası var. Söhbət Üzeyir Hacıbəylinin qoyduğu irsdən gedir. Onun gələcəyə baxmaq bacarığı, yaradıcılıq cəsarəti və çox geniş dünyagörüşü musiqiçilərin, bəstəkarların, pedaqoqların yeni adlarının peyda olunmasına çox güclü zəmin yaradıb... V.Vinoqradovun Üzeyir Hacıbəyli haqqında kitabında da heç də səbəbsiz deyilmir ki: "Onun xidmətləri həqiqətən də çox böyükdür". Bu günə qədər də bu sözlər öz təsdiqini tapır. Onun adını daşıyan indiki və sevindirici haldır ki, hər il keçirilən festival buna sübutdur. Çünki onun proqramına Üzeyir bəyin özünün əsərlərindən əlavə dünya bəstəkarlarının da maraqlı əsərləri daxil edilib. Xüsusilə sevindirici haldır ki, Azərbaycan operasını dünyaya gətirən Üzeyir bəyin “Leyli və Məcnun” operası onun doğma yurdu Şuşada tamaşaya qoyulacaq. Onun evinin yaxınlığında.

Mən bütün musiqisevərləri festivalın zəngin proqramı ilə mütləq tanış olmağa məmnuniyyətlə dəvət edirəm. Hər bir Azərbaycan vətəndaşı mədəniyyətimizi, xüsusən də onun musiqi hissəsini bilməlidir. Bunun opera, balet, simfonik əsər, kamera əsəri və ya xalq əsəri olmasının fərqi yoxdur. Hər bir istiqamətdə bizim köklərimiz, irsimiz var. Biz onlardan gəlirik. Adını Azərbaycan mədəniyyətinin qızıl fonduna yazmış, həm də dünya mədəniyyətinin ayrılmaz hissəsinə çevrilmiş dahi və heyrətamiz insanın bizə və dünyaya qoyub getdiyi hər bir musiqi ifadəsi məhz onlarla “nəfəs alır”.