Son 17 ildə əldə edilən uğurlar Vətən müharibəsində Qələbənin qazanılmasını şərtləndirib
Bakı, 9 mart, AZƏRTAC
Prezident, Yeni Azərbaycan Partiyasının Sədri İlham Əliyev YAP-ın VII qurultayındakı nitqində ölkəmizin siyasi, sosial-iqtisadi vəziyyəti barədə bəhs edərkən, diqqəti son illərdə respublikamızda, eləcə də regionumuzda yaşanan bir sıra taleyüklü hadisələrə yönəltməklə bərabər, partiyanın keçdiyi çətin, ağır, eyni zamanda, şərəfli yola da nəzər saldı. Bu baxımdan, dövlətimizin başçısının AXC-Müsavat hakimiyyəti dövrünün hərtərəfli və obyektiv təhlili xüsusi diqqət çəkdi. Azərbaycan Prezidenti o vaxt iqtidarda olan AXC-Müsavat cütlüyünün ancaq öz maraqlarını güddüyünü, təcrübəsiz şəxslərin respublikanı idarə etdiklərini xatırladaraq dedi: “Belə insanlara xalq tərəfindən inam ola bilərdimi? Ölkə tamamilə idarəolunmaz vəziyyətdə idi. Köhnə partnomenklatura demək olar ki, tamamilə iflic vəziyyətə düşmüşdü, hakimiyyətə qanunsuz yollarla gəlmiş AXC-Müsavat cütlüyü ölkəni talayırdı, dağıdırdı, müharibə gedə-gedə Ermənistana benzin satırdı. Bütün vəzifələrə rüşvət müqabilində insanlar təyin edilirdi... Azərbaycan xalqı buna dözə bilərdimi? Əlbəttə ki, yox...”.
Bu sözləri AZƏRTAC-a açıqlamasında Milli Məclisin deputatı Rəşad Mahmudov deyib.
Deputatın sözlərinə görə, belə bir şəraitdə o zaman torpaqlarımızın Ermənistan tərəfindən işğalı sürətləndi. Əslində, torpaqlarımızın düşməndən qorunması AXC-Müsavat cütlüyünü qətiyyən düşündürmürdü. Onlar üçün əsas məqsəd iqtidarda möhkəmlənmək idi. Bir sözlə, yaşayış məntəqələrimizin tapdaq altına salınması AXC-Müsavat cütlüyünün iqtidara gəlmək üçün apardığı mübarizənin, buna nail olduqdan sonra isə hakimiyyətdəki bir il ərzində idarəetmə təcrübəsizliyinin, səriştəsizliyinin məntiqi nəticəsi idi.
“Burada fikrimin təsdiqi kimi, bir faktı xatırlatmaq istərdim. Belə ki, 1992-ci il mayın 18-də Laçının işğal edilməsi ilə ölkəmiz üçün yeni faciələrin, torpaq itkilərinin əsası qoyuldu. Çünki bu rayon böyük strateji əhəmiyyət kəsb edir, Ermənistanı Dağlıq Qarabağla birləşdirən yol buradan keçir. Beləliklə, Laçının işğalından sonra Ermənistan üçün bu yol açıldı. AXC-Müsavat cütlüyü hakimiyyəti isə Laçını nəinki işğaldan azad edə bildi, əksinə, digər torpaqlarımız da erməni işğalına məruz qaldı. Əlbəttə, ərazilərimizin işğal edilməsi, həmçinin ölkəmizin üzləşdiyi dərin böhran, xaos, hakimiyyətsizlik, müstəqilliyimizin itirilmək təhlükəsi xalqı ulu öndərimizə üz tutmağa, bu dahi şəxsiyyəti ölkə rəhbərliyinə təkidlə dəvət etməyə vadar etdi. Prezident İlham Əliyev qurultayda vurğuladığı kimi, Yeni Azərbaycan Partiyasının yaranmasının tarixi zərurəti məhz bununla bağlı idi”, - deyə R. Mahmudov vurğulayıb.
Ümummilli lider Heydər Əliyevin Azərbaycanda yenidən hakimiyyətə gəlməsi ilə ölkəmizdə yeni dönüşün başlandığını bildirən deputat deyib: “Ölkə daxilində yaşanan xoşagəlməz proseslər, siyasi çəkişmələr, hakimiyyət uğrunda mübarizə tədricən aradan qaldırıldı. Dövlətçiliyin əsasları qoyuldu. Tarixin ən qanlı faciələrindən birinə - 20 Yanvar faciəsinə siyasi qiymət verildi, yeni Konstitusiya qəbul edildi. Eyni zamanda, siyasi islahatlara start verildi, çoxpartiyalı sistemin yaradılmasına başlandı. Bütün bunlarla bərabər, Azərbaycana böyük investisiyalar cəlb olundu, ordu quruculuğu diqqət mərkəzində saxlanıldı.
Əlbəttə, bütün bu tədbirlərin son 17 ildə əldə edilən uğurları, həmçinin Vətən müharibəsi modelinin tətbiqi üçün hazırlıq dövrünün əsasını şərtləndirdiyini deyən R.Mahmudov qeyd edib: “Prezident İlham Əliyev YAP-ın qurultayında ötən illər ərzində xalqımızın yalnız ərazi bütövlüyümüzün bərpa edilməsi, düşmənlərin torpaqlarımızdan qovulması kimi bir amalla yaşadığını bildirdi. Eyni zamanda, Azərbaycanda yetişən yeni gənc nəslin də bu ruhda tərbiyə olunduğunu xatırlatdı”.
Rəşad Mahmudov deyib ki, gənclik bütün dövrlərdə hər bir xalqın inkişafında, dövlətin qarşıya qoyduğu vəzifələrin yerinə yetirilməsində önəmli rol oynayıb. Bu baxımdan, Azərbaycanda sağlam, əqidəli, vətənpərvər, savadlı gəncliyin yetişməsi diqqət mərkəzində saxlanılıb. Məhz belə bir şəraitdə ötən 17 ildə dövlətçiliyimiz, müstəqilliyimiz getdikcə möhkəmlənib. Təbii ki, bu, Azərbaycan Ordusunda xidmət edən gənclərin də fəaliyyətində özünü qabarıq büruzə verib.
Erməni işğalçılarına qarşı 44 günlük haqq savaşımızda da gənc əsgər və zabitlərimizin Vətən naminə qəhrəmanlıqla döyüşmələri, canlarından keçərək şəhid və qazi olmaları, son nəticədə isə tarixi ədaləti bərpa edərək, parlaq Qələbə qazanmaları bunun bariz ifadəsidir.
“Sonda Qələbəmizi şərtləndirən bir məqamı da xüsusi vurğulamaq istərdim. Qurultayda da dövlətimizin başçısı tərəfindən vurğulandı ki, Vətən müharibəsində tarixi uğura imza atılmasının ən başlıca səbəblərindən biri Azərbaycanda daxili sabitlik yaşanması, xalq-Prezident-ordu vəhdəti olub.
Bəli, bu müharibədə qələbəmizin əsasında dövlətimizin başçısının qətiyyəti, müdrik siyasəti, Silahlı Qüvvələrimizin güc-qüdrəti nə qədər mühüm əhəmiyyətə malik idisə, xalq-Prezident-ordu birliyi də bir o qədər önəmli idi. Bu, ilk növbədə, ölkəmizdə milli həmrəyliyin möhkəmlənməsi ilə bağlı davamlı tədbirlərin gerçəkləşdirilməsi, ciddi kadr islahatının aparılması, cəmiyyətdə sosial ədalət üçün bir sıra sosial-iqtisadi islahatların həyata keçirilməsindən irəli gəlirdi.
Ölkə Prezidenti ordu quruculuğunu bütün yuxarıda sadalananlarla paralel aparıb. Ona görə də Ali Baş Komandan İlham Əliyev Ermənistana sarsıdıcı hərbi zərbənin vurulmasında qeyd etdiyi kimi, xalq-iqtidar-ordu amilinin əhəmiyyətini yüksək dəyərləndirib”, - deyə o fikirlərini yekunlaşdırıb.
Bölmənin digər xəbərləri
